Bul - áskerı saladaǵy tehnologıalyq ázirlemelerdiń bir bóligi ǵana.
Almatyda ushqyshsyz basqarylatyn qurylǵy men dronǵa qarsy keshen tanystyryldy, dep habarlaıdy Almaty-akshamy.kz
Ushqyshsyz basqarylatyn qurylǵylar, dronǵa qarsy keshender jáne vırtýaldy polıgondar – bul júıeler men tehnologıalar Digital Almaty-2023 "Jańa shynaıy sıfrlyq áriptestik" halyqaralyq forýmy aıasynda ótken kórmede tanystyryldy.
Kórmede azamattyń turǵylyqty jerin, áskerı qyzmetke jaramdylyǵyn, densaýlyǵyn, otbasylyq jaǵdaıyn jáne taǵy basqalaryn anyqtaı alatyn sıfrly tehnıka kelýshiler nazaryna usynyldy. Baǵdarlamalyq qamtamasyz etý jergilikti áskerı basqarý organdaryn sıfrlyq transformasıalaý sheńberinde ázirlendi. Qazirdiń ózinde búkil óńirde departamentterge, basqarmalarǵa jáne qorǵanys isteri jónindegi bólimderge engizildi. Odan ózge bul áskerı komısarıattarǵa ártúrli memlekettik organdardyń áskerı mindettileri týraly málimetterdi jınaqtaýǵa múmkindik beredi.
"Usynylyp otyrǵan bul aqparattyq júıe jumyldyrý resýrstaryn esepke alýdy avtomattandyrýǵa múmkindik beredi. Qazirgi ýaqytta áskerdegi kóptegen prosester avtomattandyrylǵan, qaǵazbastylyq qysqarǵan jáne Qorǵanys mınıstrliginiń azamattarǵa qyzmet kórsetý túrleri edáýir jeńildetilgen", – dedi Qorǵanys mınıstriniń sıfrlandyrý jónindegi orynbasary Darhan Ahmedıev.
Kórmede áskerı saladaǵy joǵary tehnologıalyq otandyq ázirlemeler de usynyldy. Qazdron kompanıasy radıomen basqarylatyn ushqyshsyz basqarylatyn qurylǵyny, Tactical Tech – vırtýaldy shynaıy taktıkalyq jaýyngerlik is-qımyldyń údetkishi, Kaztechinnovations – dronǵa qarsy qoldanylatyn keshenderdi kórsetti.
Forým aıasynda Qarýly Kúshterdi sıfrlandyrýǵa arnalǵan talqylaý uıymdastyryldy. Onda "Qazaqstan ınjınırıń" UK" AQ-nyń basqarma tóraǵasy Temirjan Ábdirahmanov, Túrkıanyń qorǵanys-ónerkásip kesheniniń ókili Zıa Iýsýf Chamoǵly, Elbit Systems C4i & Cyber ızraıldik kompanıasynyń ókili Ámir Zeldner jáne Thales Group fransýz kompanıasynyń Ortalyq Azıa boıynsha óńirlik dırektory Martın Rıvet de Sabatıe baıandama jasady.
Forýmǵa qatysýshylar osyndaı sharalar IT-tehnologıalar salasyndaǵy qarym-qatynasty jandandyrýǵa, ǵylymı turǵyda almasýǵa yqpal etip qana qoımaı, eldiń áskerı qaýipsizdigin qamtamasyz etý múmkindikterin de arttyrady degen pikirge keldi.