Qazaqstandyq sportshylardyń basym bóligi sátti óner kórsetti.
Almatyda tuńǵysh ret quzǵa órmeleýden jastar arasynda Ortalyq Azıa chempıonatynyń ashylýy ótti. Oǵan Qazaqstan, Ózbekstan, Qyrǵyzstan jáne Tájikstan elderinen barlyǵy 100-den astam sportshy qatysyp, baq synaıdy, dep habarlaıdy Almaty-akshamy.kz Almaty.tv silteme jasap.
Jarystyń alǵashqy kúni qatysýshylar 4 topqa bólinip, quzǵa órmeleýdiń 2 túrinen, ıaǵnı «Jyldamdyq» pen «Qıyndyq» boıynsha saıysqa tústi. Qazaqstandyq sportshylardyń basym bóligi sátti óner kórsetip, jartylaı fınalǵa joldama aldy. Nátıjesinde júldeli oryndardyń úsheýi de almatylyqtarǵa buıyryp, 14 jastaǵy Damır Toqtarov jarys jeńimpazy atandy.
«Men bolashaqta Olımpıada chempıony bolǵym keledi. Qazaqstannyń kók Týyn álemge kórsetip, Ánuranyn shyrqatamyn degen maqsatym bar», – dedi jarys jeńimpazy Damır Toqtarov.
Uıymdastyrýshylar búginde quzǵa órmeleýdiń elimizde damyp kele jatqanyn aıtady. Ásirese, Almaty, Nur-Sultan jáne Shymkentte atalmysh sportpen áýestenetinder kóp. Sonyń arqasynda qazir Orta Azıada favorıtpiz deıdi jattyqtyrýshylar.
«Myna Azıa jáne halyqaralyq federasıalar bizge jarys ótkizińder dep ótinedi. Buryn ondaı jaǵdaı bolmaǵan. Endi búginnen bastap jaǵdaı bar, sporttyq qabyrǵamyz bar. Endi sportshylarymyz úlken jeńisterge jetedi dep oılaımyz», – dedi quzǵa órmeleýden Qazaqstan jastar quramasynyń aǵa jattyqtyrýshysy Serik Egizbaev.
Aıta keteıik, Ortalyq Azıa chempıonaty 24 shildege deıin jalǵasady. Al júldeli oryndarǵa ıe bolǵan sportshylar tamyz aıynda AQSH-ta ótetin jastar arasyndaǵy álem chempıonatyna joldama alady.