Kishkentaı sábı qutqaryldy.
21 shilde kúni tústen keıin qala turǵyny Ermekbaı Tamabaev bir jasar nemeresin kóterip, úıiniń aýlasynda serýendep júrgen. Kenetten ol jylaǵan balanyń daýsyn estıdi. Sol kezde 7-qabatta podezdegi balkonnyń qorshaýynda kishkentaı balanyń salbyrap turǵanyn baıqasa kerek, dep habarlaıdy Almaty-akshamy.kz Inbusiness.kz saıtyna silteme jasap.
“Basy temir torlarǵa tirelip, denesi men qoldary syrtta salbylap turdy, ol qulap kete me dep esim shyqty", – deıdi aqsaqal.
Qolyndaǵy kishkentaı nemeresin tastap kete almaǵan qart kireberiste turǵan jastardy kómekke shaqyrǵan, biraq oǵan nazar aýdara qoıǵan eshkim bolmaǵan.
"Eger bala qulap ketse, eń bolmasa, úıge kireberistiń shatyryna kóterilýdi ótindim. Meniń ótinishime dereý kómekke jas jigit júgirip bardy. Tordyń arasynda ilinip turǵan balany sońǵy mınýttarda qutqaryp úlgerdi, ári qaraı úreıden ne isterin bilmeı turǵan anasyna tabystady", – dedi aqsaqal.
Balany aman alyp qalǵan 19 jastaǵy jas qaharman Erasyl Arhatuly bolyp shyqty. Ol Abaı atyndaǵy pedagogıkalyq ýnıversıtetiniń Dene shynyqtyrý fakúltetiniń stýdenti eken. Jas jigittiń balany qalaı qutqaryp qalǵanyn oqıǵa kýágeri, balany qutqarýǵa arashashy bolǵan Ermekbaı Tamabaevtyń ózi Almaty qalasynyń Tótenshe jaǵdaılar departamentine habarlap aıtqan.
Almaty qalasy TJD basshylyǵy QR TJ mınıstrligine joǵaryda atalǵan tulǵalardy marapattaý týraly usynys bildirdi.