Kezdesýge Qoǵamdyq keńes músheleri, máslıhat depýtattary, sarapshylar qaýymdastyǵynyń ókilderi qatysty.
Almaty qalasy Qoǵamdyq keńesiniń bastamasy boıynsha qala basshysy Erbolat Dosaevtyń qatysýymen 2025 jylǵa deıingi damý josparynyń negizgi basymdyqtary men 2030 jylǵa deıingi orta merzimdi perspektıvalar jobasy talqylandy, dep habarlaıdy Almaty-akshamy.kz.
Almaty ákimi óziniń sózinde aǵymdaǵy syrtqy jáne ishki syn-qaterler aldaǵy jyldarǵa arnalǵan josparlardy eleýli túzetýdi talap etetinin atap ótti. Birlesken jumystyń nátıjesinde Almatyny damytý ortalyǵy men túrli salalardaǵy 40-tan astam táýelsiz sarapshylar bizdiń qarjylyq jáne ózge de múmkindikterimizdi eskere otyryp, Almatynyń áleýmettik-ekonomıkalyq damýynyń asa mańyzdy jáne sonymen qatar qol jetkizýge bolatyn maqsattaryn tańdady.
Almatynyń 2025 jylǵa deıingi damý josparynyń negizgi basymdyqtary men 2030 jylǵa deıingi orta merzimdi perspektıvalar jobasy 27 maýsym men 1 shilde aralyǵynda jalpy talqylaýda boldy. Osy ýaqyt ishinde qala turǵyndary 1280 usynystar men túsiniktemeler jiberdi.
«Qala turǵyndarymen talqylaýdan keıin biz anyqtaǵan usynystar men tolyqtyrýlar qalanyń 2025 jylǵa deıingi damý josparyn jáne onyń 2030 jylǵa deıingi orta merzimdi perspektıvalaryn ázirleý kezinde eskeriletin bolady. Bizdiń basty maqsatymyz – megapolıstiń barlyq turǵyndarynyń ómir súrý deńgeıiniń sapasyn arttyrý, jaıly, ınklúzıvti jáne qaýipsiz qalalyq ortany qurý. Maqsattar men mindetter qalalyqtardyń suranystaryna negizdele otyryp, naqty jáne túsinikti KPI túrinde qalyptasty», – dep atap ótti Erbolat Dosaev.
Kezdesý barysynda Almaty ákimi qalanyń negizgi syn-tegeýrinderi men problemalyq máselelerine toqtalyp, aldaǵy jyldarǵa arnalǵan negizgi maqsattar men mindetterdi usyndy, sondaı-aq qala turǵyndarynyń suraqtaryna jaýap berdi.
«Endi bizdiń aldymyzda ózge bir úlken mindet tur – bul ıdeıalardyń barlyǵyn júzege asyrý, almatylyqtar aldyndaǵy mindettemelerdi jańa ekonomıkalyq, áleýmettik jáne saıası jaǵdaıda oryndaý. Osy usynystar men sizderdiń ıdeıalaryńyzdyń barlyǵyn tıimdi iske asyrý Jańa Qazaqstandy damytýdyń kepili bolady dep esepteımin, mıundaǵy basty maqsat bizdiń azamattarymyzdyń ómir súrý sapasyn ári olardyń ál-aýqat deńgeıin arttyrý bolyp tabylady» - dedi Erbolat Dosaev.
Almaty qalasyn damytý jospary kelesi 2 aı ishinde – aǵymdaǵy jyldyń 5 qyrkúıegine deıin bekitiletin bolady.
Almatynyń 2025 jylǵa deıingi damý josparynyń negizgi basymdyqtary men 2030 jylǵa deıingi orta merzimdi perspektıvalar jobasy tanysý úshin Almaty Damý ortalyǵynyń saıtynda qoljetimdi.