Otbasylyq-turmystyq kúsh kórsetý úshin jaýapkershiliktiń kúsheıgeni týraly Óńirlik komýnıkasıalar qyzmetiniń alańynda Almaty qalasy Polısıa departamentiniń Jergilikti polısıa qyzmeti basqarmasy basshysynyń orynbasary Dıas Dýanbekov aıtty, dep habarlaıdy Almaty-akshamy.kz
Almatynyń tártip saqshylary otbasylyq-turmystyq qarym-qatynas salasyndaǵy quqyqbuzýshylyqtardy turaqtandyrý men jaqsartýǵa baǵyttalǵan jumystardy júrgizedi. 2023 jyldyń 5 aıynyń qorytyndysy boıynsha turmystaǵy quqyq buzýshylyqtardyń úlesi barlyq tirkelgen quqyq buzýshylyqtardyń 0,05 paıyzyn qurady. Otbasylyq-turmystyq saladaǵy quqyq buzýshylyqtar 2,6 esege (14-ten 6-ǵa deıin) azaıǵan.
Dıas Dýanbekovtyń aıtýynsha, turmys barysynda kezdesetin qylmystyń negizgi túri – adam óltirý jáne dene jaraqatyn salý. Mundaı aýyr qylmystar erli-zaıyptylar arasynda – 2 jaǵdaı, birge turatyndar arasynda – 2, jaqyn týystar arasynda – 2 oqıǵa tirkelgen. Kóbinese qylmystar alkogóldik ishimdik tutyný saldarynan, qyzǵanysh pen urys-keristen keıin oryn alady.
«Otbasylyq-turmystyq ómirde kezdesetin qylmystyq jaǵdaılardy shekteýdiń bir joly - quqyq buzýshylyq jasaǵandardy profılaktıkalyq esepke alý jáne olardy ákimshilik jaýapkershilikke tartý bolyp tabylady. Osylaısha ótken merzimde otbasy-turmystyq qatynastar salasynda 1362 adamǵa qatysty is qozǵaldy, 2023 jyldyń 5 aıynda 3141 adam profılaktıkalyq esepke alyndy, onyń ishinde 2782-ne qorǵaý nusqamasy shyǵaryldy jáne 359 tulǵanyń minez-qulqyna erekshe talaptar qoıyldy», - dedi D.Dýanbekov.
Polıseıdiń aıtýynsha, turmystyq zorlyq-zombylyqtyń negizgi sebebi – ishimdikke salyný men jumyssyzdyq. Mas kúıde jasalatyn qylmystardyń aldyn alý maqsatynda 5 aıdyń qorytyndysy boıynsha 101 adam májbúrli túrde emdeýge jiberildi. Alkogóldi satý erejelerin buzǵany úshin 199 ákimshilik is sotqa joldandy.
Otbasylyq-turmystyq qatynastar salasyndaǵy quqyqbuzýshylyq áreketterdiń aldyn alý maqsatynda Qalalyq polısıa departamentiniń Jergilikti polısıa qyzmeti basqarmasynyń bastamasymen aǵymdaǵy jyldyń 15-17 aqpany jáne bıylǵy 27-29 naýryz aralyǵynda turmystyq zorlyq-zombylyqtyń aldyn alýǵa baǵyttalǵan «Turmys» jedel-aldyn alý sharalary eki ret ótkizildi.
Osylaısha, turmystyq zorlyq-zombylyqtyń aldyn alý jáne jolyn kesý, olardyń polısıaǵa senimin arttyrý, otbasynyń qoǵamdaǵy rólin nyǵaıtý, otbasy-turmystyq qatynastar salasyndaǵy quqyq buzýshylyqtardy boldyrmaý maqsatynda bıyl mamyrdyń 16-sy men 18-i aralyǵynda qala aýmaǵynda Almaty qalasy, PD JPQB bastamasymen «Zorlyq-zombylyqsyz otbasy» qalalyq aksıasy ótkizildi. Atalǵan aksıanyń maqsaty – otbasylyq-turmystyq qatynastar salasyndaǵy zańsyz áreketterdiń aldyn alý, qylmystardyń jolyn kesý, áıelder men balalarǵa qatysty turmystyq zorlyq-zombylyqtyń aldyn alý.