Jaqynda Almatyda «Jańa Qazaqstan» qoǵamdyq jastar qozǵalysy quryldy. Uıymdastyrýshylar ózderiniń alǵashqy is-sharasyn kóktemgi Naýryz merekesi qarsańynda stýdenttermen ótkizýdi uıǵardy. Ol úshin «Almaty Arenada» belgili ártister, sportshylar, qoǵam qaıratkerleri men bıznesmenderdiń qatysýymen festıvál uıymdastyryldy, dep habarlaıdy Almaty-akshamy.kz
Osylaısha, qozǵalys bastamashylary megapolıs jastaryn jańa Qazaqstannyń qurylysyna kómektesetin jańa jetistikterge yntalandyrýǵa sheshim qabyldady.
Almaty festıvali stýdent jastardy, qoǵamdyq birlestik belsendilerin biriktirdi. Bir sahnada ár túrli janrlar men stılder, ártúrli jas, mádenıet, baǵyttar kezdesti. Jas almatylyqtar ýaqytty kóńildi ótkizip qana qoımaı, eń bastysy – olar birigý formatyn jáne aldaǵy jumystyń baǵyttaryn talqylaı aldy.
Prezıdent Qasym-Jomart Toqaev óz Joldaýynda atap ótkendeı: «Jańa Qazaqstan – qazirgi urpaqtyń bolashaqqa degen kelisimi. Jańa Qazaqstandy birge quraıyq! Qasıetti Otanymyz gúldene bersin!»
«Jańa Qazaqstan» qozǵalysynyń negizin qalaýshylardyń biri kásipker Syrymbek Taý seriktesterimen birge qoǵamdyq qozǵalys qurý jáne óz qarjysyna konsert-festıval ótkizý týraly sheshim qabyldaǵanyn atap ótti.
«Jańa Qazaqstandy qurý bizdiń qolymyzda. Bizge sizder sıaqty bilimdi jáne jigerli jastar kerek! Otandyq kásipkerlikti damytý jastarǵa, kóshbasshylarǵa baılanysty. Jastar árqashan qozǵaýshy kúsh boldy», - dedi S. Taý.
Ol festıválden keıin Almaty jastary belsendilik pen syndarly ıdeıalarǵa toly bolady degen úmitin bildirdi.
Festıváldiń barlyq qatysýshylary jańa baǵyt jáne oǵan jas qazaqstandyqtardy keńinen tartý týraly aıtty. Festıvál qonaǵy prodúser jáne mýzykant Azat Ábiken jas almatylyqtarǵa óziniń patrıotızmi týraly aıtyp berdi.
«Men kóptegen elder men qalalarda boldym. Baıqaǵanym, myna jaryq dúnıede bizdiń elden artyq eshteńe joq, ol- Qazaqstan. Shaǵymdanýdyń, bireýdi kinálaýdyń, bireý kómektespedi dep aıtýdyń qajeti joq. Elimizdi birge jaqsartaıyq. Kúshimiz - birlikte. Sol arqyly biz barlyq mejelerdi baǵyndyramyz», - dep atap ótti Azat Ábiken.
Festıváldiń basty máni - qazirgi jastardyń súıikti hıtterin oryndaǵan qazaqstandyq estrada juldyzdarynyń óner kórsetýi boldy.