23 sáýir – Dúnıejúzilik kitap kúni.
Almatydaǵy Ulttyq kitaphanada «Kitap shoý-2022» sharasy uıymdastyryldy. Shara Balalar jyly aıasynda arnaıy ótkizilip otyr, dep habarlaıdy Almaty-akshamy.kz Almaty-tv silteme jasap.
Búgin – kitapsúıer kópshilik úshin erekshe kún. Sebebi, Dúnıejúzilik kitap jáne avtorlyq quqyq kúnin álemniń 100-den astam eli atap ótedi. Maqsaty – jazýshylar men aqyndarǵa qurmet kórsetý jáne jas jetkinshekterdi kitap oqýǵa baýlý.
«Mereke barysynda birneshe is-shara sıkli ótedi. Máselen, zańǵar jazýshy Muhtar Áýezovtiń 125 jyldyǵyna arnalǵan ádebı kesh. Ázilhan Nurshaıyqovtyń «Mahabbat qyzyq mol jyldar» kitabynyń keıipkerleri týraly baıqaýdyń qorytyndysy jarıalanady», – dedi QR Ulttyq kitaphanasynyń bólim jetekshisi Anargúl Rahımova.
Ilá Iýsýpjanov jastaıynan kitapqa qumar bolyp ósti. Qazir ózi de kitap jazady. Tańdaǵan baǵyty - zamanýı ádebıet salasy. Shyǵarmalary Qazaqstannan bólek, alys-jaqyn shetelderde de asa tanymal. Búgin ol merekege oraı jaryqqa shyqqan týyndylarynan kórme uıymdastyrdy.
«Búgingi sharada men ózimniń 4 kitabymdy tanystyramyn. Onyń biri «Jızn moımı glazamı» dep atalady. Bul – ózim úshin erekshe shyǵarma. Sebebi, kitapty jazýǵa kóp ýaqyt jumsadym. Menen bólek, túrli baǵyttaǵy janrda qalam terbep júrgen jas jazýshylar da óz kitaptaryn kórmege qoıdy», – dedi jazýshy Ilá Iýsýpjanov.
Qazir jastar arasynda kitapqa degen qyzǵýshylyqtyń tómen ekeni jasyryn emes. Eńbektegen baladan, eńkeıgen qartqa deıin tórtburyshty telefonǵa telmirgen zamanda mundaı sharalardy ótkizý asa mańyzdy deıdi uıymdastyrýshylar. Mereke qarsańynda Ulttyq kitaphananyń 9 zalynda oqyrmandar úshin túrli baǵytta sharalar ótti. Aıta ketken jón, jıyn erteń de megapolıstiń barlyq kitaphanalarynda jalǵasady.