Onyń erekshelikteri, maqsattary men mindetteri týraly Almaty Óńirlik komýnıkasıalar qyzmetiniń brıfıńinde qalalyq bilim basqarmasy basshysynyń orynbasary Qaırat Jumanov aıtyp berdi, dep habarlaıdy Almaty-akshamy.kz.
Salalyq sarapshylardyń pikirinshe, jańa kásipter men quzyretterdiń atlasy - qazirdiń ózinde suranysqa ıe jáne jaqyn arada paıda bolatyn mamandyqtar jınaǵy.
Qaırat Jumanovtyń aıtýynsha, atlas Almaty qalasynyń ereksheligin eskere otyryp qalyptastyrylatyn bolady. Ázirleý nátıjeleri boıynsha óńir úshin, onyń ishinde orta bilimnen keıingi tehnıkalyq jáne kásiptik Synyptaýyshqa engiziletin bolashaq kásipteri boıynsha naqty usynymdar beriletin bolady.
Qazirgi ýaqytta Almaty ákimdigi janyndaǵy memlekettik bilim berý tapsyrysyn bólý, qalyptastyrý jáne ornalastyrý jónindegi komısıa qalalyq eńbek naryǵynda suranysqa ıe mamandyqtardyń tizbesi men sanyn qalyptastyrý boıynsha jumys júrgizýde. 30 sáýirden bastap memlekettik tapsyrys qarastyrylǵan mamandyqtar týraly aqparat bilim basqarmasynyń saıtynda jarıalanady.
Spıker sondaı-aq, 2019 jyldyń qańtarynan bastap Almatynyń 20 memlekettik kolejinde jan basyna qarjylandyrý engizilgenin, al 2022 jyldyń qańtarynan bastap taǵy 29 jekemenshik kolej memlekettik tapsyrys aıasynda jumys isteı bastaǵanyn eske saldy. Memleket basshysynyń memlekettik tapsyrysty tehnıkalyq mamandyqtarǵa qaıta baǵdarlaý týraly tapsyrmasy boıynsha bıyl stýdentterdiń 60%-y kolejderge tegin negizde qabyldanady.