Almaty kolejderine oqýǵa túskisi keletin talapkerler bıyl da ózgeristerdi kútýde. Tehnıkalyq jáne kásiptik bilim beretin oqý oryndaryna túsý kezinde birqatar jańalyqtar engizildi. Olar týraly Óńirlik komýnıkasıalar qyzmetiniń brıfıńinde Almaty qalasy bilim basqarmasy basshysynyń orynbasary Qaırat Jumanov aıtyp berdi, dep habarlaıdy Almaty-akshamy.kz.
Bilim basqarmasy ókiliniń aıtýynsha, qujattardy qabyldaý 20 maýsymda elektrondy úkimet portaly arqyly jáne tikeleı kolejde bastalady. Ár talapkerdiń 4 mamandyq pen 4 kolejdi tańdaýǵa múmkindigi bar.
«Qabyldaý emtıhandary pedagogıkalyq, medısınalyq jáne shyǵarmashylyq daıyndyqty qajet etetin mamandyqtar boıynsha ótkiziledi. Barlyq basqa mamandyqtar boıynsha emtıhandar toqtatyldy», - dedi Q. Jumanov.
Jumysshy mamandyqtaryna túsýshiler áńgimelesýden ótedi, al orta býyn mamandyqtaryna úmitker talapkerler memlekettik tapsyrys boıynsha oqytý konkýrsyna qatysýy tıis. İrikteý bilim týraly atestattyń ortasha konkýrstyq baly boıynsha ótkiziledi.
Aıta keterligi, Memleket basshysynyń tapsyrmasy boıynsha kolejderge akademıalyq derbestik berilgen.
Buryndary BǴM túrli biliktilikter boıynsha orta eseppen 2 jyldan 4 jylǵa deıingi oqytý merzimderin rettep, belgilegen. Bul ereje «Bilim týraly» zańnan alynyp tastaldy. Endi bul óndiristik kásiporyndarmen kelisilgen naqty bilim berý baǵdarlamalaryna jáne jumys berýshilerge qajetti oqytý nátıjelerine baılanysty.
Búginde kolejder jumys berýshilermen birlesip, bilim berý baǵdarlamalarynyń mazmunyn, oqý merzimderin derbes aıqyndaıdy, ıaǵnı mamandardy daıarlaý eńbek naryǵynyń talaptaryna sáıkes keledi. Sonymen qatar bilim berý baǵdarlamalarynyń tizilimi jasaldy.