Almaty polısıasy taǵy bir jalǵan terrorıstti ustady, – dep habarlaıdy almaty-akshamy.kz Polisia.kz. silteme jasap.
“102” púltine baılanys operatorlarynyń birinen belgisiz bireý keńsesin jaryp jiberemin dep qorqytqany týraly habarlama kelip túsken. Qalanyń jedel jáne tótenshe jaǵdaılar qyzmeti dereý oqıǵa ornyna jetti. Ǵımaratta komısıalyq tekserý júrgizildi. Nátıjesinde jarylǵysh zat tabylmady.
– Bizdiń bólimshe qyzmetkerleri Almaly aýdandyq PB áriptestermen birlesip jalǵan terrorısti ustady. Ol 50 jastaǵy jergilikti turǵyn bolyp shyqty. Atalǵan derek boıynsha QR QK-niń 273-baby boıynsha sotqa deıingi tergeý bastaldy. Bul baptyń sanksıasy bes jylǵa deıin bas bostandyǵynan aıyrýdy qarastyrady. Mundaı zańsyz áreketter tótenshe jaǵdaılar men quqyq qorǵaý organdarynyń aıtarlyqtaı kúshteri men resýrstaryn jumsaýǵa ákep soǵatyny barshaǵa málim. Aıta keterligi, kináli adam jaýapqa tartylýmen qatar, sot sheshimimen jalǵan qońyraý shalǵany úshin shyǵyndy tolyǵymen tóleıdi, – dedi Almaty qalalyq PD ekstremızmge qarsy kúres basqarmasynyń basshysy Darhan Ábiqulov.
QR QK-niń 201-babyna sáıkes ózge aqparat tergeý múddesine oraı jarıa etilmeıdi. QR Konstıtýsıasynyń 77-baby 3-bólimi 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.