Qarttar kúni qarsańynda megapolıste birqatar is-sharalar josparlanǵan, olar bir aı kóleminde ótedi. Egde jastaǵy almatylyqtarǵa qandaı qoldaý kórsetiletini jaıly Óńirlik komýnıkasıalar qyzmetiniń brıfıńinde Almaty qalalyq Ardagerler keńesiniń tóraǵasy Ahan Bıjanov baıandap berdi, dep habarlaıdy almaty-akshamy.kz
Almatynyń Ardagerler keńesi áleýmettik qoldaý jasap, jergilikti atqarýshy organdarmen birlesip, qart adamdarǵa kómek kórsetedi. Aıta ketý kerek, ardagerler uıymy qalanyń qoǵamdyq birlestikteriniń ishinde adam sany jóninen kóp bop sanalatyndardyń biri - onyń quramynda 253 myńnan astam adam bar.
«90-shy jyldary Birikken Ulttar Uıymynyń Bas Assambleıasy búkil álemde qarttar kúnin ótkizý týraly qarar qabyldady. Bizdiń qalada máslıhat qazan aıy boıy qart adamdar aılyǵyn ótkizý sheshimi qabyldady. Bul sheshimdi qoǵam ókilderi de bolyp otyr. Ádette, osy ýaqytta, ıaǵnı qazan aıynyń basynda qalalyq ardagerler keńesi tóralqasynyń músheleri qala basshylyǵymen kezdesedi, onda olar bizdiń qalamyzdyń ardagerler uıymdary men ardagerler qoǵamynyń ómirindegi kóptegen problemalyq máseleler boıynsha keńesedi», - dep bólisti A. Bıjanov.
Ardagerler uıymynyń basshysy atap ótkendeı, qart adamdarǵa arnalǵan aılyq barynsha keń aýqymdy bolmaq - qalada tıisti is-sharalar jospary ázirlendi. Ár aýdanda kópshiliktiń qatysýymen mádenı-demalys is-sharalary uıymdastyrylady. Ásirese ardagerler úshin túrli syılyqtar jasalyp, qaıyrymdylyq túski astar uıymdastyrylady. Bul kúnderi qart adamdar murajaılarǵa, teatrlarǵa, ekskýrsıalarǵa jáne t. b. bara alady.
Sonymen qatar, medısınalyq mekemelerde ashyq esik kúnderi ótkiziledi, qart almatylyqtar terapevt, gerontolog, nevropatolog, hırýrg jáne basqa da mamandardyń qabyldaýynan óte alady. Ózdiginen bara almaıtyn qarttarǵa medısınalyq qyzmetkerlerdiń keshendi brıgadalary úılerine barady.
«Árıne, bul bir kúndik, bir aılyq qana jumys emes dep aıtar edim, bul jumys maqsatty túrde, ákimdiktiń basshylyǵymen jyl boıy júrgizilip keledi. Bul jumys qala jáne aýdan ákimdikterimen birlesip atqarǵan qalanyń ardagerler uıymdarynyń negizgi jumysy bolyp tabylady», - dep atap ótti Ardagerler keńesiniń tóraǵasy.
Sondaı-aq, ol qala ardagerleri men zeınetkerlerine praktıkalyq kómek kórsetiletinin atap ótti. Qarjylyq qoldaýdyń ártúrli túrlerin (13 túri) kórsetýge tek qala búdjetinen qarajat bólinedi. Ystyq jáne sýyq sý eseptegishterin ornatý jáne aýystyrý, gaz jabdyqtaryn júrgizý jáne ornatý shyǵyndary óteledi. Sonymen qatar, sanatorıılerdegi joldamalardyń quny jáne taǵy basqalar óteledi. Ótken jyly ǵana 1 mlrd teńgeden astam somaǵa 14 myńǵa jýyq zeınetkerge birjolǵy kómek kórsetildi.