Almaty qalasynyń Óńirlik komýnıkasıalar qyzmeti alańynda qala ákiminiń orynbasary Nurlan Ábdirahym áleýmettik kómektiń tek qarjylyq emes, sonymen birge azamattardy eńbekke tartýǵa baǵyttalǵanyn atap ótti. Sonyń biri – múgedektigi bar adamdardy jumyspen qamtý jáne beıimdeý maqsatyndaǵy «JOBCOACH» jobasy. Jyl basynan beri megapolıste 1 620 adam jumyspen qamtý baǵdarlamalaryna qatysqan.
Sonymen qatar, 34 myń qalalyq ınfraqurylym nysanyn beıimdeý úshin 2030 jylǵa deıin pasporttaý júrgizilýde. Bul prosesti «Sıfrlyq ınklúzıa» platformasy arqyly baqylaý qamtamasyz etiledi.
«Áleýmettik qyzmet kórsetý salasynda 9 medısınalyq-áleýmettik mekeme, 14 úkimettik emes uıym jáne aýdandyq ákimdikterdiń 8 úıde qyzmet kórsetý bólimshesi lısenzıalanǵan. Jyl saıyn 7 myń qyzmet alýshy qamtylady. Sondaı-aq, 1,6 myń áleýmettik qyzmetkerge eńbekaqysynyń 30 %-y mólsherinde yntalandyrý ústemaqysy engizildi», - dedi Nurlan Ábdirahym.
2026 jyldyń alǵashqy jartyjyldyǵyna deıin 1 myńnan astam maman biliktilikti arttyrý kýrsynan ótedi. Baǵdarlamanyń maqsaty – olardyń kásibı deńgeıin arttyrý, jańa ádistemelerdi engizý men kórsetiletin qyzmetterdiń sapasyn jaqsartý.
Almatyda birneshe áleýmettik ortalyqtar sátti jumys isteýde: damýynda aýytqýy bar 3 jasqa deıingi balalarǵa kómek kórsetetin «Erte aralasý ortalyǵy», «Otbasyny qoldaý ortalyǵy», sondaı-aq 24 myń zeınetkerge túrli áleýmettik jáne bilim berý qyzmetterin usynatyn «Belsendi uzaq ómir ortalyǵy».
«Memleket basshysynyń tapsyrmasy boıynsha 150 oryndyq ońaltý ortalyǵynyń jobalaý jumystary aıaqtalyp keledi. Ortalyqta balalar men eresekterge arnalǵan qyzmetter kórsetiletin bolady. Jobany iske asyrý 2026 jyly bastalady. Sonymen qatar, Naýryzbaı, Bostandyq jáne Medeý aýdandarynda jańa ońaltý ortalyqtaryn ashý josparlanýda, olardyń jalpy qamtýy 200 adamǵa deıin jetedi», - dep qorytyndylady Nurlan Ábdirahym.