Almaty densaýlyq saqtaý salasynyń negizgi kórsetkishteri boıynsha el kóleminde kósh bastap tur. Bul týraly Almaty qalasy ákiminiń orynbasary Nurlan Ábdirahym Óńirlik komýnıkasıalar qyzmetiniń baspasóz-máslıhatynda málimdedi.
Onyń aıtýynsha, qala ákimdigi úshin densaýlyq saqtaý júıesin damytý – basty basymdyqtardyń biri. Negizgi maqsat – árbir almatylyq úshin medısınalyq kómektiń sapasy men qoljetimdiligin arttyrý.
Qazirgi tańda qalada 221 medısınalyq uıym jumys isteıdi. Onda 36 myńnan astam medısına qyzmetkeri, sonyń ishinde 10 myń dáriger eńbek etýde. 2025 jyly salany damytýǵa 58 mlrd teńge bólindi, onyń ishinde 56,2 mlrd teńge – qalalyq búdjettiń qarajaty.
2025 jyldyń 9 aıynyń qorytyndysy boıynsha, Almaty densaýlyq saqtaý kórsetkishteriniń barlyǵy boıynsha turaqty ósim kórsetýde:
Ana ólimi – nólge teń. Respýblıka boıynsha ortasha kórsetkish – 100 myń tiri týǵanǵa shaqqanda 9,5 jaǵdaı;
Sábıler ólimi respýblıka deńgeıinen 23%-ǵa tómen jáne ótken jylmen salystyrǵanda 22,7%-ǵa azaıǵan;
Onkologıalyq ólim-jitim respýblıka kórsetkishinen 8%-ǵa tómen;
Týberkýlezben syrqattaný deńgeıi ortasha respýblıkalyq kórsetkishten 1,7 ese tómen.
«Bul nátıjeler – aldyn alý sharalarynyń, dıagnostıkany jańǵyrtýdyń jáne qalalyq dárigerlerdiń kásibı sheberliginiń jemisi», – dep atap ótti Almaty qalasy ákiminiń orynbasary.