Polıseıler olardy ýaqytsha ustaý ızolátoryna qamady.
Almatyda páter tonaýdyń úsh faktisine qatysy bar degen kúdikpen eki azamat qamaýǵa alyndy, dep habarlaıdy Almaty-akshamy.kz.
İshki ister mınıstrliginiń resmı saıtyndaǵy málemet boıynsha, ustalǵandardyń qylmys jasaý tizbegi standartty bolǵan. Polıseılerdiń aıtýynsha, olar aýlalardy aralap, kóp qabatty úılerdiń terezeleri men kireberisterin ańdyp júrgen. Úılerge kirgennen keıin, laıyqty kiltti taýyp, esikti ashtqan, sosyn qoldaryna túsken qundy zattardyń bárin alǵan.
«Qolma-qol aqsha, usaq turmystyq tehnıka jáne ár túrli áshekeı buıymdar. Sońǵy fakt «Almaly» turǵyn úı kesheni mekenjaıynda tirkeldi. Kiltti tańdaý arqyly olar páterge kirip, jalpy quny 500 myń teńgeniń jeke múlkin urlap ketken», – deıdi Almaty qalasy PD krımınaldyq polısıa basqarmasynyń bastyǵy Qýatbek Naýatov.
Onyń aıtýynsha, 37 jáne 35 jastaǵy eki qylmysker de Almaty oblysynyń Qapshaǵaı qalasynda Almaty qalalyq PD KPB arnaıy top qyzmetkerleriniń júrgizgen jedel izdestirý is-sharalary kezinde ustaldy.
Mamandardyń aıtýynsha, ustalǵandardyń ekeýi de buryn isti bolǵan, urlyq, tonaý jáne qaraqshylyq úshin jazasyn ótegen. Qazirgi ýaqytta ustalǵandardyń Almaty qalasynda páter tonaýdyń úsh faktisine qatysy bar ekendigi dáleldendi. Olar ýaqytsha ustaý ızolátoryna qamaldy. QR QK-niń 188-baby 3-bóligi boıynsha sotqa deıingi tergeý amaldary júrgizilýde.
