Shara maqsaty - adam saýdasyna baılanysty bolyp jatqan problemalarǵa nazar aýdartý.
Dúnıejúzilik adam saýdasyna qarsy kúres kúnine oraı «jasotandyqtar» «Biz adam saýdasyna qarsymyz!» aksıasyn ótkizdi, dep habarlaıdy Almaty-akshamy.kz.
İs-sharanyń maqsaty - adam saýdasyna baılanysty bolyp jatqan problemalarǵa nazar aýdartý jáne «Birge adam saýdasyna qarsymyz!» uranymen memlekettik uıymdar men azamattyq qoǵamdardy jumyldyrý.
Atalmysh is-shara Atakent Moll saýda ortalyǵynda ótti. Al, aksıanyń sımvoly – «kók júrek» boldy. Ol adam saýdasy qurbandarynyń ókinishi, adamdardy satqandardyń tas júreginiń belgisi. Belsendiler aksıa barysynda qatysýshylar men qonaqtarǵa qala turǵyndaryna adam saýdasy máselesi týraly eskertip, «kók júrek» beınelengen pecheneler taratty.
Sonymen qatar, bir top belsendiler barlyq sanıtarlyq normalardy saqtaı otyra, adam jıi júretin oryndarǵa baryp, aldyn alý jumysyn júrgizdi. Qala turǵyndaryna adam saýdasy máselesi, tetikter, quldyqtyń saldary týraly aıtyldy. "Jasotandyqtar" taqyryptyq býkletter, japsyrmalar, sondaı-aq baılanys nómirleri kórsetilgen jadynamalar men plakattardy taratyp, Qazaqstannyń ózge de óńirlerine chellendj joldady.
Eń qorqynyshtysy, keıbireýler úshin adam saýdasy máńgilikke qıratylǵan ómir bolsa, al basqalary úshin mıllıondaǵan, tipti mıllıardtaǵan dollar paıda ekendiginde. 30 shilde - Dúnıejúzilik adam saýdasyna qarsy kúres kúni, bul degenimiz máseleniń ózektiligin taǵy bir ret kórsetip, adamzat tarıhynyń ejelgi dáýirden beri jalǵasyp kele jatqan jáne aqparattyq qoǵamnyń progresıvti dáýirinde de joıa almaǵan bólshegi retinde qala beretin qaýiptilik ekendigin eske salady.
Aksıaǵa krımınaldyq polısıa departamentiniń ókilderi qatysyp, qoldaý kórsetti.
