Bıyl 17 mamyrda bastalǵan kúrdeli jóndeý jańa jylǵa deıin bitýi kerek
1505 bala onlaın oqýǵa májbúr. Almaty oblysyna qarasty Gúldala aýylyndaǵy jalǵyz mektep kúrdeli jóndeýge jabylǵan, dep habarlaıdy Almaty-akshamy.kz Almaty.tv-ge silteme jasap.
Sońǵy qońyraýy men birinshi qyrkúıegi meıramhanada ótken ata-analar keler jylǵa deıin másele sheshilmeı me dep alańdaıdy. Óıtkeni, oqý maýsymy jaqyndaǵanda mektep ákimshiligi «Balalardyń bári kórshi aýylǵa baryp oqıdy» degen. Oǵan jaǵdaı da jasalǵan kórinedi.
«Avtobýs jaldaımyz, balalardy 3 mektepke bóldik, bárin uıymdastyrdyq» degen. Al oqý bastalǵanda biri de joq», – dedi Gúldala aýylynyń turǵyny Marına Fedınkova.
«Avtobýs bólindi. Búgin jınalysta aıtypty. 4 avtobýsqa 111 adamdy syıǵyzamyz, kútińizder, shydańyzdar», – dedi Gúldala aýylynyń turǵyny Zýlmıra Mámıeva.
Oqýshylar áli onlaın oqyp keledi. Al kemi 20 shaqyrym bolatyn kórshi aýyldarǵa balany kún saıyn aparyp-ákelý de ońaı emes. Máseleni tıisti organdardyń aldynda ashyq aıttym degen mektep basshysy kútýden basqa amal joq dep otyr.
«Bizge avtobýstar bolady» dep aıtqan bolatyn. Osy ýaqytta biz ata-analardyń bárin daıyndap, búgin saǵat 14:30-da 3 mektepke balalardy aparý kerek bolǵanbyz. Avtobýs shyqpaıtynyn aıtty», – dedi №21 mekteptiń dırektory Qýan Aıtbaev.
Avtobýstyń shyqpaıtynyn aıtqan aýdan mamany munyń bári tenderge tikeleı qatysty deıdi.
«Oblystyq ishki aýdıt lısenzıanyń joq bolýyna baılanysty jarıalaǵan usynysymyzdy toqtatty. Kelisim-shartqa qol qoıylǵan jaǵdaıda oqýshylardy mektepke aparady», – dedi Talǵar aýdany bilim bólimi basshysynyń mindetin atqarýshy Lázzat Qurmanbaeva.
Oqý jylynyń bastalǵanyna 1 aıǵa jýyqtady. «Bul másele jazda-aq sheshilýi tıis edi» degen ata-analar naqty jaýapty áli de ala almaı keledi.
Mektep 1967 jyly salynǵan. Bıyl 17 mamyrda bastalǵan kúrdeli jóndeý jańa jylǵa deıin bitýi kerek. Jospar solaı. Al 1505 bala oǵan deıin basqa mektepke bara tura ma, joq qurylystyń aıaqtalǵanyn kúte me, ony ázirge eshkim dóp basyp aıta almaıdy.