Almaty ákimi Darhan Satybaldy Fransıa Respýblıkasynyń Qazaqstandaǵy Tótenshe jáne Ókiletti Elshisi Sılvan Gıogemen kezdesti.
Kezdesýde ekonomıka, kásipkerlikti damytý, mádenı-gýmanıtarlyq baılanystar, sondaı-aq kólik ınfraqurylymy, qalalyq ortany jańǵyrtý jáne megapolıste jaıly ómir úshin zamanaýı sheshimderdi engizý máseleleri talqylandy.
Darhan Satybaldy Almaty elimizdiń iri megapolısi retinde fransýz bıznesimen ártúrli salalarda – týrızm, qonaqúı ındýstrıasy, shaǵyn jáne orta kásipkerlik baǵytynda seriktestikke ashyq ekenin atap ótti.
"Búginde Almatyda fransýz kapıtalynyń qatysýymen shamamen 60 kásiporyn jumys isteıdi. 2005 jyldan beri Qazaqstan ekonomıkasyna quıylǵan fransýz ınvestısıasynyń jalpy kólemi 20 mlrd dollardan asty. Biz seriktester úshin barlyq jaǵdaıdy jasap otyrmyz: qalada arnaıy ekonomıkalyq jáne ındýstrıalyq aımaqtar bar. Sonymen qatar mádenı-gýmanıtarlyq baılanystar da belsendi damýda. Almatyda fransýz tili men mádenıeti joǵary baǵalanady. Qalamyzdyń iskerlik ortasy sergek, jańashyldyqqa ashyq ári senimdi seriktestikke umtylysymen erekshelenedi", – dedi Almaty ákimi Darhan Satybaldy.
Óz kezeginde Sılvan Gıoge Fransıanyń bilim, mádenıet jáne ekonomıka salalarynda yntymaqtastyqty keńeıtýge jáne birlesken jobalardy júzege asyrýǵa múddeli ekenin jetkizdi.
Kezdesý sońynda taraptar ekijaqty baılanystardy nyǵaıtý jáne Qazaqstan men Fransıany jaqyndastyratyn jańa bastamalardy damytý nıetin rastady.