Almaty ákimi Darhan Satybaldy qalanyń aktıvimen kezdesip, Qazaqstan Respýblıkasynyń Prezıdenti Qasym-Jomart Toqaevtyń halyqqa Joldaýynda aıtylǵan mindetterdiń oryndalý barysyn talqylady.
Kezdesýge qala ákimdigi men aýmaqtyq organdardyń ókilderi, sarapshylar, máslıhat depýtattary, Qoǵamdyq keńestiń jáne Qazaqstan halqy Assambleıasynyń músheleri, shyǵarmashylyq qaýym jáne úkimettik emes uıymdar qatysty.
«Almaty – elimizdiń eń iri megapolısi, ǵylym men bilimniń ortalyǵy. Sondyqtan Prezıdentimizdiń strategıalyq mindetterin júzege asyrýda, ásirese sıfrlyq transformasıa men jasandy ıntellektti engizýde qalamyzdyń róli aıryqsha», – dedi Almaty ákimi.
Onyń aıtýynsha, búginde elimizdegi IT-qyzmet naryǵynyń 53 paıyzy Almatynyń úlesinde. Onyń kólemi – 4 trln teńge. Qalada Alatau Creative HUB, Farabi Hub jáne elimizdegi alǵashqy Almaty Digital Medical Center – sıfrlyq medısına ortalyǵy jumys isteıdi.
Ákimniń sózinshe, basty mindetterdiń biri – ınvestısıa kólemin arttyrý. 2030 jylǵa deıin Almatyda jalpy quny 3,6 trln teńgeden asatyn 190 joba júzege asyrylady, – dedi qala ákimi.
Týrızmdi damytýǵa da erekshe kóńil bólinip otyr. Negizgi joba – Almatynyń taý klasteri. Ol 2029 jylǵa qaraı Ortalyq Azıadaǵy eń iri jyl boıy jumys isteıtin týrısik ortalyqqa aınalady. Nátıjesinde jyl saıyn shamamen 1 mln sheteldik týrıs kelip, qala ekonomıkasyna 300 mlrd teńgeden astam kiris kirgizedi.
Joldaýdaǵy mańyzdy baǵyttardyń biri – ekologıa. Bul – biryńǵaı ekologıalyq standarttardy engizý, sý resýrstaryn únemdeý jáne olardy basqarýǵa arnalǵan sıfrlyq platforma qurý. Sonymen birge, «Taza Qazaqstan» baǵdarlamasy ulttyq basymdyq retinde belgilendi.
Kezdesý sońynda Darhan Satybaldy Memleket basshysy aıqyndaǵan mindetter – barshaǵa ortaq maqsat ekenin atap ótti. Olardy júzege asyrý jergilikti atqarýshy organdardyń, aýmaqtyq qurylymdardyń, ǵylymı qaýym men azamattyq sektordyń birlesken is-qımylyn talap etedi. Qalanyń aktıvimen ótken ashyq dıalog naqty sheshimder ázirleýge jol ashty.