Qazaq kınosynyń kúníne oraı elímízde būryn-sońdy bolmaǵan auqymdy joba – «JARQYRA» respublıkalyq kastıngí bastalady. Būl turaly Ūlttyq kınony qoldau memlekettík ortalyǵynyń basqarma tóraǵasy Qūrmanbek Jūmaǵalı málímdedí.
Kastıng 15 qyrkúıek kúní, saǵat 11:00-19:00 aralyǵynda, elímízdíń 19 qalasyndaǵy mádenıet oshaqtarynda bír mezette ótedí. Kastıngke 18 jastan bastap qatysu múmkíndígí bar. Joba óńírlík talanttardy anyqtauǵa jáne olardyń otandyq kınoındustrıyaǵa jol tabuyna baǵyttalǵan.
«Būl – jaı kastıng emes. Būl – armanǵa aparar naqty múmkíndík. Oǵan búgínde tanymal akterler dálel: Guzel Jan – «Igromanka» fılmíndegí basty róldí somdaǵan aktrısa, Samal Eslyamova – «Aıka» fılmí arqyly Kann festıvalínde júlde alǵan aktrısa, Marat Ábíshev – «Adam jáne alma» fılmíníń basty keıípkerí.
Olardyń joly – osyndaı kastıngterden bastalyp, úlken ekranǵa deıín jetken sáttí úlgí. Aldaǵy uaqytta kastıngten ótken qatysushylar Ortalyqtyń akterlík bazasyna engízílíp, bolashaqta otandyq kınojobalarǵa qatysuǵa múmkíndík alady», – dedí Qūrmanbek Jūmaǵalı.
Íríkteuden ótken úmítkerlerdíń derekterí www.kazakhcinema.kz saıtyndaǵy akterlík onlaın-bazaǵa ornalastyrylady. Būl baza – kınokompanıyalar men prodyuserler úshín jańa esímderdí tabuǵa múmkíndík beretín ashyq árí qoljetímdí alań bolmaq.
Būǵan deıín de Ūlttyq kınony qoldau memlekettík ortalyǵynyń bastamasymen jáne qoldauymen otandyq kıno salasynda bírqatar jańa esímder tanylyp, elímízdíń mádenı áleuetín nyǵaıtuǵa súbelí úles qosyp keledí. Atalǵan jūmystar Memleket basshysynyń mádenı sayasatty jańǵyrtu jóníndegí tapsyrmalaryn íske asyru ayasynda, Mádenıet jáne aqparat mınıstrí Aıda Balaevanyń jetekshílígímen júıelí túrde jalǵasyp keledí.
«Sońǵy jyldary 34 debyuttík fılmge qoldau kórsetílíp, jańa buyn rejısserler men akterlerdíń qalyptasuyna naqty jaǵdaı jasaldy. Jaqynda ǵana jaryqqa shyqqan, apat taqyrybyn qozǵaıtyn «QAITADAN» debyuttík fılmí 1 apta íshínde 500 mıllıon teńgege juyq kassalyq tabys jınap, kórermenníń yqylasyna bólendí. Sonymen qatar, otandyq kınolar halyqaralyq festıvalderde de moıyndalyp, elímízdíń mádenı brendíne aınalyp keledí», – dep atap óttí Qūrmanbek Jūmaǵalı.