Almaty ákimi Erbolat Dosaev pen AQSH Saýda Palatasynyń Taıaý Shyǵys, Túrkıa jáne Ortalyq Azıa isteri jónindegi aǵa vıse-prezıdenti Kýsh Choksı ekonomıkalyq baılanystardy nyǵaıtý jáne qalanyń bıznes-ekojúıesin damytý maqsatynda ekijaqty yntymaqtastyq máselelerin talqylady. Kezdesýge AQSH-tyń Almaty qalasyndaǵy bas konsýly Kerolın Sevıdj, Qazaqstan-Amerıka İskerlik keńesiniń bas atqarýshy dırektory Djennıfer Mıll, isker toptardyń ókilderi (Chevron, Valmont Irrigation, Coca Cola, Mastercard, Borusan Caterpillar, Honeywell Kazakhstan) qatysty, dep habarlaıdy almaty-akshamy.kz
Almaty respýblıkanyń iri qalasy jáne qarjy ortalyǵy retinde Qazaqstan men Qurama Shtattary arasyndaǵy saýda men ınvestısıalardy ilgeriletýde mańyzdy ról atqarady.Qalada 128 birlesken kásiporyn jáne 399 amerıkandyq kompanıa tirkelgen (barlyǵy QR-da – 695). Almaty men AQSH arasyndaǵy taýar aınalymy 2022 jyly 21,7%-ǵa ulǵaıyp, 805,7 mln dollardy qurady.
Erbolat Dosaev atap ótkendeı, Almaty ınvestısıalyq senimdilik deńgeıi jónindegi pozısıasyn saqtaıdy. Megapolıstiń ınvestısıalyq tartymdylyǵyn 2022 jylǵy jeltoqsanda Fitch Ratings agenttigi "turaqty" boljamymen «VVV» deńgeıinde rastaldy. Qalanyń úlesine el JİÓ-niń besten bir bóligi (2022 jyly 18,5%) jáne Qazaqstan Respýblıkasy búdjetiniń barlyq kiristeriniń tórtten birinen astamy tıesili. Shaǵyn jáne orta kásiporyndar qala ekonomıkasynyń shamamen 60%-dy quraıdy jáne onyń ósýiniń negizgi qozǵaýshy kúshi bolyp tabylady. Almatynyń ınfraqurylymyn damytý jáne logıstıkalyq múmkindikteri óńirlik baılanystardy, saýda marshrýttary men kólik jelilerin nyǵaıtýǵa yqpal etýi múmkin.
Óz kezeginde Kýsh Choksı myrza ózara tıimdi seriktestikti keńeıtýge daıyn ekenin bildirdi. AQSH Saýda palatasy 3 mıllıonnan astam kompanıany, jekelegen shtattar men mýnısıpalıtetterdiń 3 myńǵa jýyq saýda palatalaryn, 830 qaýymdastyqty jáne shet elderdegi 111 amerıkandyq Saýda palatalaryn biriktiredi. Qazaqstanda AQSH Saýda palatasynyń qurylymdyq birligi Qazaqstan-Amerıka İskerlik keńesi (USKZBC) bolyp tabylady, onyń quramynda 26 múshe bar.
Kezdesý qorytyndysy boıynsha taraptar ekijaqty qatynastardy odan ári damytý, ınvestısıalar tartý jáne Almaty men Amerıka Qurama Shtattary arasyndaǵy ekonomıkalyq baılanystardy keńeıtý týraly ýaǵdalasty.