«2 aı ýaqyt beremiz, mektepti qaıtaryńyzdar»: depýtat Almaty oblysynda mektepti jeke menshikke satyp jibergender jaıly.
Almaty oblysynda mektepti jeke menshikke satyp jibergen, dep habarlady Almaty-akshamy.kz.
Bul týraly Májilis depýtaty Maqsat Tolyqbaı aıtty, dep jazady Azattyq Ruhy.
«Ótken aptada ǵana Almaty óńirinen keldim. Mekteptiń jaıyn aıtyp jatyrsyzdar ǵoı. Men sizderge bir sumdyqty aıtaıyn. Biz bar mekteptiń ózin satyp jatyrmyz. Almaty oblysy Qarasaı aýdany Shalqar aýylynda Lomonosov atyndaǵy 250 orynǵa arnalǵan orta mektep bolǵan. Sońǵy jyldary tolyǵymen kúrdeli jóndeý jasalyp, jańadan sport zal salynyp berildi. Barlyq aýyl balasy qýanyp júrgende, aýyl mektebin jeke qolǵa satyp jibergen. Ony ákimdikten basqa kim satady? Ony 15 mln teńgege satqan, tizbekpen ketip, ekinshisi 80 mln teńgege satqan. Prokýratýraǵa «qaıda qarap otyrsyńdar?» dep aıttyq. «Sot shaǵymymyzdy qabyldamaıdy, shamamyz jetpeıdi» dep otyr», - dedi ol.
Depýtat qulaıyn dep turǵan úıdiń ózi 17 mln teńge turatynyn aıtty.
«Sumdyq qoı. Úlken mektepti 15 mln teńgege satyp jibergen. Almaty oblysynyń ákimi, bul qaı ákimniń, qalaı satylǵanyn tabý qıyn emes. Barlyǵyn bilip otyrmyz. 2 aı ýaqyt beremiz, qaıtaryńyzdar. Áıtpese, famılıa boıynsha sońyna jetemiz», - dedi Maqsat Tolyqbaı.