Almaty ákimi Darhan Satybaldy Alataý aýdanyna jasaǵan jumys sapary barysynda «Aıgerim-1,2» jáne «Shańyraq-1» shaǵynaýdandarynyń turǵyndarymen kezdesti.
Turǵyndar aýyzsý jáne káriz jelileriniń qurylysy baıaý júrip jatqanyna narazylyq bildirdi.
«Aıgerim-1,2» shaǵynaýdanynda taratý jelileriniń qurylysy júrgizilip jatyr. Jobany júzege asyrý 2021 jyly bastalǵan. Sý qubyrynyń jalpy uzyndyǵy – 104,5 shaqyrym, káriz jelisi – 29,5 shaqyrym. Qala ákimi jumystyń oryndalý qarqynyna kóńili tolmaı, baqylaýdy kúsheıtýdi tapsyrdy. Qurylysty aıaqtaý kelesi jylǵa josparlanǵan.
Budan bólek, Darhan Satybaldy kóshelerdi asfálttaýdy soza bermeı, jeli qurylysy bitken aýmaqtarǵa jol jabyndysyn kezeń-kezeńimen tóseýdi, al jumys áli júrip jatqan ýchaskelerde ýaqytsha asfált qıyrshyǵyn paıdalanýdy tapsyrdy.
Sonymen qatar, «Shańyraq-1» shaǵynaýdanynda turǵyndarmen kezdesý ótti. Munda da taratý jelilerin salý jobasy júzege asyrylyp jatyr. Joba boıynsha uzyndyǵy 45,7 shaqyrym sý qubyry, 53,8 shaqyrym káriz jelisi jáne 10 kárizdik-sorǵy stansıasy salynyp, 2,2 myńnan astam tutynýshy qamtylýy tıis.
Turǵyndar jobanyń uzaqqa sozylǵanyna shaǵymdandy. Almaty ákimi jumysty eki aı merziminde aıaqtaýdy tapsyrdy. Sonymen qatar, turǵyndardyń ótinishi boıynsha bastapqy jobaǵa kirmegen tórt kóshege asfált tóseledi. Injenerlik jeliler tartylyp bitken ýchaskelerde de kezeń-kezeńimen jol jabyndysy tóseledi.
Jergilikti halyq jol qaýipsizdigi, kóshe jaryǵy, balalar alańqaılaryn salý jáne ózge de máselelerdi kóterdi. Darhan Satybaldy jaýapty basqarmalarǵa olardy sheshý joldaryn qarastyryp, turaqty baqylaýda ustaýdy tapsyrdy.