Almaty qalasynyń ákimi Darhan Satybaldy ál-Farabı atyndaǵy Qazaq ulttyq ýnıversıtetine baryp, negizgi ǵylymı ortalyqtarmen, ınovasıalyq jobalarmen jáne kampýsty damytý josparymen tanysty.
Eń áýeli qala basshysyna Farabi Hub ınovasıalyq ónimder men joǵary tehnologıalyq jobalar ortalyǵy kórsetildi. Aýdany 5 000 sharshy metr bolatyn bul ǵylymı-zertteý alańy stýdentterdi, zertteýshilerdi jáne kásipkerlerdi biriktirip, kreatıvti ındýstrıa, jasandy ıntellekt jáne startap salasyndaǵy jobalardy júzege asyrýǵa múmkindik beredi. Darhan Satybaldynyń aıtýynsha, jastarǵa múmkindik berý men ǵylymı ázirlemelerdi naqty ekonomıkaǵa engizý qaladaǵy basty basymdyqtyń biri.
Ári qaraı ákim zamanaýı óndiris pen jasandy ıntellekt tehnologıasyna negizdelgen bes ınovasıalyq platformany qamtıtyn robototehnıka ortalyǵynyń jumysymen tanysty. Bul ortalyq stýdentterge ozyq tehnologıalardy meńgerýge jáne jańa sheshimder ázirleýge jol ashady.
«Ál-Farabı atyndaǵy Qazaq ulttyq ýnıversıtetinde ǵylym men bilimdi damytý úshin barlyq jaǵdaı jasalǵan. Munda irgeli ǵylym men ınovasıa toǵysyp, jańa ıdeıalar dúnıege keledi. Prezıdent Qasym-Jomart Toqaev óziniń sońǵy Joldaýynda jastardy qoldaýdyń, ǵylymdy damytýdyń jáne joǵary oqý oryndarynyń halyqaralyq básekege qabilettiligin arttyrýdyń mańyzdylyǵyn erekshe atady. QazUÝ osy mindetterdi júzege asyrýda kósh bastap keledi», – dedi Darhan Satybaldy.
Ákim jańa oqý ǵımarattarynyń qurylysyna da erekshe nazar aýdardy. Jalpy aýmaǵy 32 000 sharshy metr bolatyn úsh jeti qabatty ǵımaratta ǵylymı zerthanalar, dárisqanalar men konferens-zaldar, aýdıtorıalar, sondaı-aq demalys pen pikirtalas alańdary qarastyrylǵan.
Darhan Satybaldy Qytaı ǵylym akademıasymen birlesip qurylǵan «Qashyqtan zondtaý tehnologıalary jáne olardyń qoldanylýy» atty qazaq-qytaı zerthanasyna da bardy. Munda Ortalyq Azıadaǵy jahandyq ekologıalyq jáne klımattyq ózgeris, sonyń ishinde qýańshylyq, jerdiń tozýy, sý tapshylyǵy men Kaspıı teńiziniń tartylýy syndy taqyryptar zerttelip jatyr. Zerthananyń negizgi maqsaty – qorshaǵan ortanyń jaı-kúıin baǵalap, keleshekke boljam jasaýǵa múmkindik beretin ǵylymı negiz qurý.
Sapar sońy sýperkompúterler ortalyǵyna arnaldy. Onyń ónimdiligi 2 000 teraflopsqa teń, bul Qazaqstan men Ortalyq Azıada teńdesi joq kórsetkish. Sondaı-aq, ol álemdegi eń myqty 600 sýperkompúterdiń qataryna engen.