Almatyda WorldSkills qozǵalysyn damytýdyń qorytyndysy shyǵaryldy. «VIII WorldSkills Kazakhstan-2023» respýblıkalyq chempıonatynyń jeńimpazdary men júldegerlerin - Almaty qalasy qurama komandasynyń ókilderin quttyqtady.
Bolashaq jas mamandardy yntalandyrý jáne qoldaý maqsatynda, sondaı-aq kolej stýdentteriniń respýblıkalyq deńgeıdegi jetistikterin eskere otyryp, Almaty qalasynyń ákimdigi 9 jeńimpazdy aqshalaı syılyqtarmen marapattady: «Qurǵaq qurylys jáne sylaq jumystary», «Prototıpteý», «Kishi synyptarda oqytý», «Elektronıka» atty 4 quzyrettilik boıynsha 1 oryn alǵandarǵa 200 myń teńgeden, «Santehnıka jáne jylytý» quzyrettiligi boıynsha 2 oryn alǵandarǵa 150 myń teńgeden, «Dánekerleý tehnologıalary», «Jelilik jáne júıelik ákimshiliktendirý», «Mobıldi robototehnıka», «Vızýaldy merchandaızıng jáne vıtrınıstıka» 4 quzyreti boıynsha 3 oryn alǵandarǵa 100 myń teńgeden aqshalaı syılyqtar berildi.
Eske salsaq, 23-25 qarasha aralyǵynda Astana qalasyndaǵy «EKSPO» halyqaralyq kórme ortalyǵynyń alańynda WorldSkills Almaty 2023 óńirlik chempıonatynyń jeńimpazdary WorldSkills Kazakhstan 2023 respýblıkalyq chempıonatyna qatysty.
Almaty qalasynyń quramasynda 30 quzyrettilik boıynsha 32 qatysýshy boldy. Chempıonat qorytyndysy boıynsha Almaty quramasy elimizdiń 20 óńiri arasynda jalpy medaldyq esep boıynsha 2 oryndy ıelendi. Quramanyń qorjynynda - 4 altyn, 1 kúmis jáne 4 qola medal. Jalpy medaldyq esepte Almaty qurylys-tehnıkalyq kolejiniń stýdentteri úzdik bolyp, qurǵaq qurylys, sándik jumystar jáne dánekerleý tehnologıalary boıynsha joǵary sheberlik deńgeıin kórsete otyryp, barlyq medaldardy jeńip aldy. Almaty memlekettik polıtehnıkalyq kolejiniń qatysýshylary modelder jasaý, serverlik jabdyqtar men baǵdarlamalyq qamtamasyz etýdi baptaý boıynsha kásibı sheberlikterin kórsetti. Ortalyq Azıa tehnıkalyq-ekonomıkalyq kolejiniń qatysýshylary elektrondy sqemany qurý, qurastyrý jáne baǵdarlamalaý boıynsha úzdik boldy. «Bastaýysh synyptarda oqytý» quzyretine qatysqan №2 Almaty memlekettik gýmanıtarlyq-pedagogıkalyq kolejiniń stýdentteri pedagogıkalyq sheberlik daǵdylary boıynsha altyn medaldy jeńip aldy. Kórneki saýda erejelerin qoldaný, taýarlardy tıimdi ornalastyrý,quraldar men tehnologıalardy utymdy qoldaný boıynsha Almaty servıstik qyzmet kórsetý kolejiniń bilim alýshylary qola medaldy ıelendi.
Baıqaýǵa qatysýshylardyń chempıonatta joǵary jeńisterge jetýine uzaq ýaqyt boıy qatysýshylardy iriktegen jáne daıarlaǵan sarapshy-kompatrıottardyń yqpaly zor boldy.
«WSA sarapshylar qaýymdastyǵyna, konkýrstyq alańdardy joǵary deńgeıde uıymdastyrǵan qala kolejderi men olardyń áleýmettik seriktesterine, respýblıkalyq chempıonattyń qorytyndysy boıynsha júldeli oryndarǵa ıe bolǵan jeńimpazdarǵa, sońǵy irikteý týrynan ótken jáne 2024 jylǵy 10-15 qyrkúıek aralyǵynda Fransıanyń Lıon qalasynda ótetin WorldSkills halyqaralyq chempıonatyna qatysatyndarǵa zor rızashylyǵymdy bildiremin. Balalarymyzǵa sáttilik tileımiz!»,- dedi Almaty qalasy bilim basqarmasynyń basshysy Lázzat Jylqybaeva.
Aıta keterligi, 2023 jyly Almaty qalasy ákimdiginiń qoldaýymen 200 adam Túrkıa, Qytaı, Fınlándıa, Germanıa, Italıa, Shveısarıa, Fransıa, Brazılıa, Estonıanyń oqý ortalyqtarynda halyqaralyq taǵylymdamadan ótip, WorldSkills halyqaralyq standarttary aıasynda jańa praktıkalyq daǵdylardy ıgerdi.
