Megapolıstiń Alataý aýdanynyń ákimi Azamat Qaldybekov Óńirlik komýnıkasıalar qyzmetiniń brıfıńinde mektepter, balabaqshalar men medısınalyq pýnktterdiń salý josparlary týraly aıtty, dep habarlaıdy almaty-akshamy.kz
Azamat Qaldybekovtyń aıtýynsha, jyl saıyn qarqyndy damyp kele jatqan Alataý aýdanynda jańa mektepter men balabaqshalar qurylysy suranysqa ıe. Munda jańa shaǵynaýdandar paıda bolyp, turǵyn úı keshenderi salynýda.
«Biz úshin qala turǵyndaryna jaıly ómir súrý jaǵdaıyn jasaý ǵana emes, sonymen qatar jas urpaqqa zamanaýı bilim berý úderisin uıymdastyrý óte mańyzdy. Bul máseleni júıeli túrde sheship jatyrmyz. Ázirge aýdanda 26 memlekettik jáne 2 jekemenshik mektep bar, onda 47 060 adam oqıdy. Oqýshylar oryndary jetispeıdi, biz ony 7800 oryndyq 5 mektep salý arqyly sheshetin bolamyz», - dedi Azamat Qaldybekov.
Saıaly shaǵynaýdanynda 1800 oryndyq, Tomırıs, Nurkent, Darhan, Rahat-Mádenıet shaǵynaýdandarynda árqaısysy 1500 oryndyq jańa mektepter paıda bolady. Qurylystyń aıaqtalý merzimi - 2022 j.
Shapaǵat shaǵynaýdanynda 600 oryndyq №150 mekteptiń jańa ǵımaratyn salý josparlanýda. Qazirgi ýaqytta jer telimderin qaıtarý boıynsha jumystar júrgizilýde. Shildede asqana, medıateka men sport zaly ornalasqan 125 oryndyq №166 mekteptiń qosalqy ǵımaraty paıdalanýǵa berildi. Mektepke deıingi mekemelerde oryn jetispeýshiligi máselesi sheshilýde. Qazir Alataý aýdanda 20 memlekettik jáne 153 jekemenshik balabaqsha bar. «2021 jyly 2 balabaqsha salý josparlanýda. Nurkent shaǵynaýdanynda 320 oryndyq jáne Saıalyda 280 oryndyq balabaqsha salynady», - dep jalǵastyrdy sózin aýdan ákimi.
Sondaı-aq, Azamat Qaldybekov aýdanda qandaı medısınalyq mekemeler salynatynyn aıtty. Ázirge Alataý aýdanynda 5 memlekettik jáne 2 jeke medısınalyq mekeme jumys isteıdi. Barlyǵy 240 myń adam bekitilgen. Aqbulaq, Tomırıs, Túrkistan, Shapaǵat, Rahat-Mádenıet shaǵynaýdandarynda 5 dárigerlik ambýlatorıa bar.
«Biz medısına salasyn qoldaýǵa jáne alǵashqy medısınalyq-sanıtarlyq kómekti kúsheıtýge kóbirek kóńil bólýge tyrysamyz. Basqasha aıtqanda, sapaly medısınalyq qyzmet kórsetý jáne olardyń qoljetimdiligin arttyrý maqsatynda Saıaly shaǵynaýdanynda aýysymyna 200 kelýshige arnalǵan bastapqy medısınalyq-áleýmettik kómek ortalyǵy salynady. Qazirgi ýaqytta jobalyq-smetalyq qujattama ázirlenýde. Sonymen qatar Qarasý shaǵynaýdanynda sol ortalyqtyń qurylysyna jobalyq-smetalyq qujattar daıyndalýda», - dedi Azamat Qaldybekov.
Alataý aýdanyndaǵy Darhan shaǵynaýdanynda qyrkúıekte №25 qalalyq emhana aýmaǵynda modýldik KT ortalyǵyn ornatý josparlanýda.
Sóziniń sońynda Azamat Qaldybekov Nurkent shaǵynaýdanynda Qazaqstan Respýblıkasy Densaýlyq saqtaý mınıstrligi Juqpaly aýrýlar ulttyq ǵylymı ortalyǵy ǵımaratynyń qurylysy bastalǵanyn aıtty.