Aıyp taǵý úshin tergeýge tyıym joq.
Qazaqstannyń Ádilet mınıstri Qanat Mýsın BAQ ókilderiniń Qaırat Satybaldyulynyń ustalýyna qatysty suraǵyna jaýap berdi, dep habarlaıdy Almaty-akshamy.kz QazAqparatqa sileme jasap.
«Eń aldymen zań otbasy múshelerin aıqyndaıdy. Nemere týystary kirmeıdi. Ekinshiden, qatelespesem, «Tuńǵysh Prezıdent týraly» zańda Tuńǵysh Prezıdentti, onymen birge turatyn otbasy múshelerin qylmystyq jaýapkershilikke tartýǵa bolmaıtyndyǵy aıtylǵan. Iaǵnı, aıyp taǵýǵa bolmaıdy. Al aıyp taǵý úshin tergeýge tyıym joq», - dedi ol.
Mınıstrdiń aıtýynsha, tergeý, qandaı da bir is-qımyl bolýy múmkin.
«Bul tulǵalardy ustaýǵa jáne tutqyndaýǵa bolmaıdy. Oǵan zań tyıym salady. Biraq olarǵa suraq qoıýǵa jáne jaýap alýǵa tyıym joq», - dedi Qanat Mýsın.
Esterińizge sala ketsek, Qaırat Satybaldyuly «Qazaqtelekom» AQ-nyń qarajatyn asa iri kólemde urlaý kúdigimen ustalyp, ýaqytsha ustaý ızolátoryna qamaldy.
2022 jylǵy 15 naýryzda Nur-Sultan qalasynyń mamandandyrylǵan aýdanaralyq tergeý soty kúdikti Q.Satybaldyulyna qatysty 2 aı merzimge kúzetpen ustaý túrindegi bultartpaý sharasyn sanksıalady.
Aıta ketsek, QR «Tuńǵysh Prezıdenti týraly» 3-babyna sáıkes, tıispeýshilik Qazaqstan Respýblıkasynyń Tuńǵysh Prezıdentine – Elbasyna jáne onymen birge turatyn otbasy múshelerine jeke menshik quqyǵymen tıesili barlyq múlikke, sondaı-aq olar paıdalanatyn turǵyn jáne qyzmettik úı-jaılarǵa, qyzmettik kólikke, baılanys quraldaryna, jazysqan hattaryna, olarǵa tıesili qujattarǵa qoldanylady.