Jeke tulǵalardyń bankrottyǵyn retteıtin zań jobasyn tanystyrǵan Memlekettik kirister komıteti tóraǵasynyń orynbasary Qaırat Mıatov bankrottyq rásimdegen azamattar neshe jyl nesıe ala almaıtynyn aıtty, dep habarlaıdy Almaty-akshamy.kz QazAqparatqa silteme jasap.
«Tólem qabiletin qalpyna keltirý dep atalatyn jeke tulǵa bankrottyǵynyń úshinshi joly boryshkerge sot arqyly qaryzdy tóleý boıynsha shegerimder berýdi kózdeıdi. Ol úshin tólem qabiletin qalpyna keltirý josparyn ázirleý kerek. Bul jospar qarjylyq basqarýshynyń atsalysýy arqyly ázirlenedi. Josparǵa kredıdor men boryshkerdiń ekeýi de kelisim berýi qajet. Boryshkerdiń múlkin satý sıaqty sharalardyń bári tek osy josparǵa engen jaǵdaıda ǵana iske asady. Josparǵa kirmegen sharalardyń bári qaryzdy qaıtarý úshin qoldanylmaıdy», - dedi komıtet ókili.
Onyń sózinshe, Qazaqstanda 1 mıllıonnan astam adamnyń moınynda problemalyq borysh bar. Biraq onyń bári jeke tulǵanyń bankrottyǵyn rásimdeıdi degen sóz emes. Óıtkeni bankrottyq rásimdeýdiń de saldary bar.
«Bankrottyq rásimdegen boryshker 5 jyl kóleminde bankter men mıkrokredıttik uıymdardan qaryz ala almaıdy. Shetelge shyǵýǵa 3 jyl boıy tyıym salynady. Bul tyıymǵa shetelde emdelý, bilim alý, týysqanyn jerleý rásimine qatysý jáne jumysqa ornalasý sebepteri kirmeıdi. Bul sebepter bolǵan jaǵdaıda tıisti qujattardy kórsetý kerek bolady. Ekinshi ret bankrottyq rásimdeý úshin aldyńǵy bankrottyqtan keıin 7 jyl ýaqyt ótýi kerek. Zań jobasynda osyndaı negizgi bazalyq qaǵıdattar engizilgen», - dedi Qaırat Mıatov.