Marafonshy óz saparyn Atyraýdan bastamaq
Qazaqstannyń búkil óńirin jaıaý aralap shyqqan 72 jastaǵy Sársenbaı Qotyrashev endi álem elderine saıahat jasamaq. Bul týraly jıhangez óziniń áleýmettik jelidegi paraqshasynda jazdy, dep habarlaıdy Almaty-akshamy.kz QazAqparatqa silteme jasap.
«Ózderińiz biletindeı, ótken jyly óz ómirimde jańa qadam bastap, jaıaý júrip óttim. Júrgen jerimde meni tań qaldyrǵan, qýantqan jáne buryn bastan keshirmegen erekshe emosıalarǵa kóz jetkizdim. Birinshi ekspedısıam sátti aıaqtaldy. Bul saparymda josparlaǵan merzimnen buryn kózdegen mejege jetken sátti jetistik boldy. 72 jyl ishinde alǵash ret týǵan elimizdiń kóptegen kórikti jerlerin aralappyn. Endigi kezekte onyń sheńberinen shyǵyp, jer sharyn aınalyp shyǵýdy jón kórdim. Óıtkeni, bir joldyń sońy - qashanda jańa joldyń basy», - dep jazdy Sársenbaı Qotyrashev óziniń İnstagram paraqshasynda.
Marafonshy óz saparyn Atyraýdan bastap, orta jáne soltústik jarty shardaǵy 14 eldi aralap, Óskemende aıaqtaýdy josparlap otyr.
Eske salaıyq, Sársenbaı Qotyrashev byltyr Qazaqstannyń barlyq óńirlerin jaıaý aralap shyqqan edi.
Ol óz saıahatyn Ulytaýdan bastap, Aqtaýda aıaqtady. Osy aralyqta jıhankez 8 myń shaqyrymnan asa qashyqtyqty júrip ótken.