Memleket basshysynyń tapsyrmasy boıynsha bastamashylyq jasalǵan «Aýyldyq densaýlyq saqtaýdy jańǵyrtý» ulttyq jobasynyń sheńberinde josparlanǵan 655 medısınalyq-sanıtarıalyq alǵashqy kómek nysandarynyń 540-y salyndy, taǵy 115-i aǵymdaǵy jyldyń sońyna deıin aıaqtalady, - dep habarlaıdy Aqshamnews.kz.
Bul týraly OKQ brıfıńinde QR Densaýlyq saqtaý vıse-mınıstri Tımýr Muratov habardar etti.
Bul rette 200-ge jýyq aýyldyq eldi mekende alǵash ret jańa medısınalyq mekemeler paıda boldy jáne medısınalyq kómek aýyl turǵyndary úshin qoljetimdi boldy.
«346 nysan eskirgen ǵımarattardyń ornyna, 194 nysan buryn medısınalyq ınfraqurylymmen qamtylmaǵan aýyldarda salyndy. Joba boıynsha barlyǵy 260 medısınalyq pýnkt, 235 FAP jáne 160 dárigerlik ambýlatorıa salynady», - dedi T.Muratov.
Árbir nysannyń jobasy biryńǵaı standarttar boıynsha ázirlenedi jáne oǵan telemedısına, fızıoterapıa kabınetteri, dárihana pýnktteri, emdik dene shynyqtyrý zaldary kiredi. Olar úshin jabdyqtardyń 70%-dan astamyn otandyq kásiporyndar óndiredi.
Sonymen qatar 32 aýdandyq ortalyq aýrýhana, 12 jumys istep turǵan kópbeıindi aýdandyq ortalyq aýrýhana jáne 20 jumys istep turǵan aýdandyq ortalyq aýrýhana jańǵyrtylady.
Búgingi tańda 10 KAOA qurylys-montajdaý jumystaryn aıaqtady, qalǵandary 2026 jyldyń sońyna deıin qurylys-montajdaý jumystaryn aıaqtaıdy.
Olardyń bazasynda ınsýlt jáne júrek ortalyqtary, hırýrgıa, travmatologıa, ońaltý jáne qarqyndy terapıa bólimsheleri ashylady. Temirtaý, Balqash, Jańaarqa, Úrjar, Shý, Merke, Talas jáne Beıneý qalalarynda segiz aýrýhana qaıta quryldy.
Densaýlyq saqtaý vıse-mınıstri medısınalyq kadrlarmen qamtamasyz etý máselelerine jeke toqtaldy. Ulttyq jobanyń sheńberinde aýyldyq medısınalyq uıymdarda jumys isteý úshin 1100-den astam maman daıarlaý josparlanýda.
Ulttyq jobany iske asyrý kezeńinde aýyldyq uıymdarǵa 1009 medısına qyzmetkeri jiberildi jáne jumysqa ornalastyryldy, onyń ishinde MSAK nysandaryna - 55 jalpy praktıka dárigeri, 168 orta medısına qyzmetkeri, aýdandyq aýrýhanalarǵa 400-den astam beıindi dáriger jáne 380-den astam meıirger jumysqa ornalasty.
Aýyldyq eldi mekenderge jumys isteý jáne turý úshin kelgen densaýlyq saqtaý mamandaryna «Dıplommen aýylǵa!» baǵdarlamasynyń sheńberinde áleýmettik qoldaý sharalary kórsetiledi.
Sondaı-aq medısına qyzmetkerleriniń mártebesin arttyrý maqsatynda áleýmettik kepildikter men yntalandyrýshy tólemder paketi keńeıtildi.
Sonymen, 2024 jyldan bastap aýyldyq jerge jumysqa keletin asa tapshy mamandyqtardyń medısına qyzmetkerlerine 100 ETJ – 8,5 mln teńge mólsherinde birjolǵy aqshalaı tólemdi kózdeıtin norma iske asyrylýda.
Atalǵan sharalar kesheni aýyl turǵyndary úshin medısınalyq kómektiń qoljetimdiligin arttyrýǵa jáne densaýlyq saqtaý júıesiniń kadrlyq áleýetin nyǵaıtýǵa baǵyttalǵan.