Qazaqstan qutqarýshylaryn aparǵan bortpen Túrkıadan 16 qazaqstandyq jáne Qyrǵyz Respýblıkasynyń eki azamaty Astanaǵa jetkiziledi. Syrtqy ister mınıstriliginiń resmı ókili Aıbek Smadıarov BAQ ókilderimen ótken brıfıńte osyndaı derek aıtty, dep habarlaıdy Almaty-akshamy.kz QazAqparatqa silteme jasap.
«Osy bortpen elge qaıtýǵa nıet bildirgen birqatar azamattarymyzdy Qazaqstanǵa ákelý josparlanyp otyr. Atap aıtqanda, saǵat 15:00-degi jaǵdaı boıynsha, 18 adam elge qaıtýǵa nıet bildirdi. Qazaqstannyń 16 azamaty jáne Qyrǵyzstannyń 2 azamaty bar. Atalǵan bort Astanaǵa keledi dep kútilip otyr. Ushý ýaqyty qosymsha habarlanady», - dedi Aıbek Smadıarov.
Eske salsaq, Túrkıanyń ońtústik-shyǵysynda bolǵan zilzaladan qaza tapqandar sany 2 921 adam ekeni habarlanǵan edi. Sońǵy derekter boıynsha, apattan zardap shekkender sany 3 419-ǵa jetken.
Búgin tańerteń Qazaqstan TJM 41 qutqarýshysy apat saldaryn joıýǵa kómek kórsetý úshin Túrkıaǵa jetti.
Qazirgi tańda Túrkıada qalǵan Qazaqstan azamattaryn Gazıantep qalasynan elge áketý sharalary júrgizilip jatyr. Elge qaıtamyn degen Qazaqstan azamattary 7 aqpan saǵat 12:00-de Gazıantep qalasynyń áýejaıynda tıisti prosodýradan ótip, daıyn bolýy tıis. Sonymen qatar, Qazaqstanǵa oralýǵa nıetti azamattar tizimin jasaý úshin +90 538 8807041, +90 3124919100 telefon nómerlerine habarlasýy kerek.
Aıta ketsek, Qazaqstan Aýyl sharýashylyǵy mınıstrligi Túrkıadaǵy jaǵdaıǵa baılanysty azyq-túlikpen gýmanıtarlyq kómek kórsetýge daıyn ekenin málimdedi.