Sharaǵa 20-ǵa jýyq memleketten delegasıa qatysady.
20-22 naýryz kúnderi İ KazAgro/KazFood Turkistan halyqaralyq kórme-jármeńkesi ótedi, dep habarlaıdy Almaty-akshamy.kz
Budan ózge elimizdiń barlyq óńirinen aýyl sharýashylyǵy salasynyń ókilderi, ınvestorlary, taýar óndirýshileri qatyspaq.
25 jyldan beri kórme uıymdastyrýmen aınalysyp kele jatqan maman, "ExpoGroup" kompanıasynyń dırektory Sholpan Qojabaevanyń aıtýynsha, aýyl sharýashylyǵy salasy boıynsha keń aýqymdy kórmeler Astana jáne Almaty qalalarynda ǵana ótkizilgen. Endi úshinshi bolyp Túrkistan shaharynda uıymdastyrylmaq.
"Birinshi halyqaralyq "KazAgro/KazFood Turkistan" halyqaralyq kórme-jármeńkesin ótkizýge Túrkistan qalasyn tańdaýymyzdyń máni bar. Birinshiden, Túrkistannyń tarıhy tereńde, ol – Uly Jibek jolynyń boıyndaǵy saýda ortalyǵy. Tarıhı jáne týrısik oryndary kóp. Ekinshiden, Naýryz merekesin uıymdastyrýǵa osy aımaqta aýa raıy óte qolaıly. Qazirdiń ózinde alys-jaqyn shet memleketter osy kórmege qyzyǵýshylyq tanytyp otyr. Barlyq oblystan da delegasıalar keledi. İs-shara aıasynda aýyl sharýashylyǵy boıynsha shetel ınvestorlary men kásipkerlerimen iskerlik kezdesýler uıymdastyrylady. Qazaqstannyń úzdik qolónershileri keramıkadan, júnnen, temirden jáne shynydan buıymdar jasaý, kilem toqý boıynsha túrli sheberlik saǵattaryn ótkizedi. Ulttyq taǵamdar men kıimderimiz jurtshylyq nazaryna usynylady. Aýyl sharýashylyǵy, jylyjaı sharýashylyǵy, veterınarıa, saýda, kásipkerlik salalary boıynsha da túrli kelissózder júrgizilip, usynystar talqylanady. Shetelden jáne elimizden júzdegen ókilderdiń kelýi óńirde týrızm salasyn damytýǵa da serpin bermedi. Sebebi óńirdegi tarıhı oryndar týraly surap jatqan sheteldikter bar", – deıdi Sholpan Qojabaeva.
Kórmege álemniń jáne kórshiles elderdiń tanymal kompanıalary men aýyl sharýashylyǵy taýaryn óndirýshileri úzdik ónimderin, tehnıkalaryn ákeledi dep kútilip otyr. Sýsyndar, shyryndar, sý, shaı, kofe, taǵamdyq qospalar, tamaq jáne sýsyn óndirýge arnalǵan jabdyqtar, tońazytqysh, saýda jáne qoıma jabdyqtary, aýyl sharýashylyǵy tehnıkasy men jabdyqtary jáne olardyń qosalqy bólshekteri jetkiziledi.