Almaty-akshamy.kz saıtynda búgin jaryq kórgen jańalyqtar – kún kerýeni
Sáýir de táýir bolmaı tur...
«Qazgıdromet» RMK sınoptıkterdiń málimetinshe, Qazaqstan aýmaǵynyń ońtústik, ońtústik-shyǵys, shyǵys bóligine áli de Ońtústik sıklon áser etedi jáne atmosferalyq fronttardyń ótýimen naızaǵaı oınap, jańbyr jaýady. Ulytaý oblysynyń shyǵysynda túnde 2 gradýs aıaz kútiledi. Mańǵystaý oblysynyń basym bóliginde, ortalyǵynda, shyǵysynda, batysynda órt qaýpi joǵary bolýy múmkin.
Qoı terisin jamylǵan qasqyr
Shymkentte qala turǵyndaryna kúsh qoldaný arqyly úlken kólemdegi qarajatty ashyq túrde ıemdengen úsh er adam tutqyndaldy.
QR PD baspasóz qyzmetiniń habarlaýynsha, kúdiktiler polısıa qyzmetkerleriniń atyn jamylyp, turaqty túrde aqsha bopsalaýmen aınalysyp, "qorǵaýǵa" alamyz dep, aı saıyn tólem talap etken. Kúdiktilerdiń birinen polısıa qyzmetkeriniń jalǵan qyzmettik kýáligi tárkilendi. Al ekinshi kúdikti alaıaqtyq úshin buryn sottalǵan bolyp shyqty. Qaskóıler 10 jylǵa deıin bas bostandyǵynan aıyrylýy múmkin.
Taǵdyrdyń tálkegine tastamaımyz!
Tasqyn sýdan zardap shekkenderge qatysty Memleket basshysy Qasym-Jomart Toqaev osylaı dedi.
«Biz syn saǵatta jurt bolyp jumyldyq. Úkimet, memlekettik organdar, quzyrly mekemeler jáne eriktiler birlese jumys istedi. Sonyń arqasynda 119 myńnan astam adam der kezinde qaýipsiz jerge kóshirildi. Onyń 45 myńǵa jýyǵy – balalar. Eń bastysy, biz adam ómirin barynsha saqtap qaldyq», dedi Prezıdent Qazaqstan halqy Assambleıasynyń "Birlik. Jasampazdyq. Órleý" atty HHHİİİ sesıasynda sóılegen sózinde.
«Toı – tondynyki»
Ysyrapshyldyqqa jol bermeýdi maqsat tutqan Qyrǵyz úkimetindegiler endi toıǵa barmaýy múmkin.
Qyrǵyzstan prezıdenti ákimshiliginiń alqa májilisinde mınıstrler kabınetiniń basshysy Aqylbek Japarov úkimet múshelerine toıǵa barýǵa tyıym saldy.
"Eger siz bir jerde ysyrap jasalǵanyn kórseńizder, ol jerge barmańyz. Toıda júrmeńizder", dedi A.Japarov.
Elýden asyp baramyn...
Bıyl «Kúmis jas» jobasy aıasynda elýden asqan 10 myńǵa jýyq adam jumysqa ornalastyryldy. Osy baǵytta barlyǵy 19 060 adamdy jumysqa ornalastyrý josparlanýda. Bul jobaǵa 50 jastan asqan jumyssyz adamdar zeınetkerlik jasqa tolǵanǵa deıin qatysa alady. Jobaǵa qatysý úshin mansap ortalyǵyna ótinish berý qajet.
«Shınel» kimdiki?
Tbılısıden arnaıy shaqyrtylǵan rejıser Nıkoloz Sabashvılı Gogoldiń «Shınel» povesin Almaty Memlekettik qýyrshaq teatrynyń tórinde kórermenge qýyrshaq beınesimen jańasha formatta tartý etti.
«Bul sapar meniń ásem Almatyǵa kelgen úshinshi tájirıbem. Grýzıa qýyrshaq teatrlar birlestigi men Almaty Memlekettik qýyrshaq teatry arasynda yntymaqtastyq memorandýmyna qol qoıyldy. Araǵa bir jyl salyp, jolym ásem Almatyǵa qaıta túsip otyr. Qonaqjaı da darhan peıildi qýyrshaq teatry meni óte jyly qabyldady. Men qoıylym sahnalaýǵa kelisken sátten durys tańdaý jasaǵanyma kúmándanǵan emespin. Nátıjesin patsha kóńildi kórermen baǵalaı jatar», dedi Grýzıa qýyrshaq teatrlar birlestiginiń basshysy Nıkoloz Sabashvılı.
10 myń qadamǵa sozylǵan marketıń
Búkil álemde bir kúnde 10 myń qadam júrý sánge ári ádetke aınalyp barady. Uzaq ýaqyt boıy on myń qadam júrý normasy salaýatty ómir saltyn ustanýdyń altyn erejesi sanaldy.
Bul ıdeıa Japonıada kezdeısoq paıda bolǵan. Tokıodaǵy eń iri klınıkalardyń biriniń basshysy Ivao Ohıa ınjener Iýrı Katomen sóılesip otyryp, qazirgi japondyqtar qozǵalýdy toqtatty dep shaǵymyn aıtady. Bul onyń aıtýynsha, júrek aýrýy men semizdikke shaldyǵý jaǵdaılarynyń kóbeıýine ákeldi. Osy kezde Ohıaǵa ár japondyqty kúnine on myń qadam júrýge májbúrleý arqyly ulttyń densaýlyǵyn saqtaýǵa bolady dege oı keledi. Bul ıdeıa ınjenerge de unaıdy jáne ol birden jumysqa kirisedi. Eki jyldan keıin, 1965 jyly Kato Yamasa Tokei Keiki naryqta jańa qurylǵyny - álemdegi alǵashqy patenttelgen júrgen qadamdy esepteıtin "shagomerdi" usyndy.
Semeıge nege órt úıir?
Tótenshe jaǵdaılar mınıstrliginiń málimdeıinshe, «Semeı ormany» taǵy órtendi. Búgin"Semeı ormany" memlekettik tabıǵı orman rezervaty Borodýlıha fılıalynyń Dmıtrev orman sharýashylyǵynyń memlekettik ınspektory orman órtin anyqtaǵan.
"Órt ornyna 7 birlik órt sóndirý mashınasy men orman kúzetiniń 11 adamy shyqty. Órtti sóndirý júrgizildi. Budan ári algorıtmge sáıkes órt týraly habarlama Abaı oblysynyń TJD-ne berildi. Órtti sóndirýge 36 adam jáne 9 birlik tehnıka jumyldyrylǵan", delingen habarlamada.
39 paıyzdyq otandyq kıno
Ulttyq statısıka búrosynyń málimetinshe, 2023 jyly Qazaqstanda 387 fılm túsirilgen. Barlyq túsirilgen fılmniń tek 25 paıyzy tolyqmetrajdy bolsa, qalǵan 75 paıyzy qysqametrajdy fılmder. Kınoǵa barýshylardyń 39 paıyzy otandyq kınolardy kórgen. Bul shamamen 8,2 mıllıon adamdy quraıdy.