Záýlim úılerin kúndiz-túni tómen tarıfpen jylytatyndar úshin jańa júıe boıynsha gazdyń tekshe metri qymbatyraq bolýǵa tıis. VIII saılanǵan QR Parlamentiniń birinshi sesıasynyń otyrysynda Memleket basshysy Qasym-Jomart Toqaev osylaı málimdedi, dep habarlaıdy Almaty-akshamy.kz QazAqparatqa silteme jasap.
«Byltyr taýar gazynyń tapshylyǵyna tap boldyq. Bul jaǵdaı búkil elimizdiń energetıkalyq qaýipsizdigine qater tóndire jazdady. Mundaı keleńsizdikke jol bermeý úshin naryqty gazben qamtamasyz etý kerek. Qazaqstanda gazdyń baǵasy kórshi memleketterge qaraǵanda áldeqaıda arzan. Sheteldegi sıaqty ártúrli tarıfterdi bizge de engizý múmkindigin qarastyrǵan jón. Jalpy, tómen tarıfter men tómen baǵalar ekonomıkamyzǵa teris yqpal etedi. Bólingen barlyq sýbsıdıalar kórshi elderge bosqa ketedi. Qanshalyqty qıyn bolsa da, bul máseleni birtindep sheshý qajet. Basqa jol joq», - dep málim etti Prezıdent.
Memleket basshysy bul baǵytta áleýmettik ádildik ornatý qajet ekenin basa aıtty. Qasym-Jomart Toqaevtyń sózinshe, kúndiz-túni záýlim úılerin tómen tarıfpen jylytatyndar úshin gaz baǵasy qymbatyraq bolýy tıis.
«Qazirgi ýaqytta záýlim úılerin kúndiz-túni tómen tarıfpen jylytatyndar úshin jańa júıe boıynsha gazdyń tekshemetri qymbatyraq bolýǵa tıis. Áleýmettik ádildik degenimiz - osy. Qolda bar shıkizatty paıdalaný tıimdiligin arttyrý mańyzdy. Kúndelikti turmysta da, memleket deńgeıinde de únemdep úırený kerek. Bul - álemdik tájirıbe. Onyń ózektiligi qazirgi kúrdeli geosaıası ahýal jaǵdaıynda kúsheıe tústi. Óndiriste de, turmysta da gazdy arzan eken dep beı-bereket jaǵa berýge bolmaıdy. Muny doǵarý kerek. Úkimet Taýar gazynyń energetıkalyq tıimdiligin arttyrý jáne ony únemdi paıdalaný josparyn ázirleýi qajet», - dedi Memleket basshysy.