Aldaǵy ýaqytta sý máselesi ýshyǵyp ketýi múmkin. Bul týraly Parlament palatalarynyń birlesken otyrysynda Memleket basshysy Qasym-Jomart Toqaev aıtty, dep habarlaıdy Almaty-akshamy.kz.
«Taǵy bir másele – sý qaýipsizdigin qamtamasyz etý. Bul – strategıalyq mańyzy bar mindet. Aldaǵy ýaqytta sý máselesi ýshyǵyp ketýi múmkin. Sol sebepti, bizge onyń aldyn alý qajet. Qazir Úkimet Sý kodeksiniń jańa jobasyn ázirlep jatyr. Sý resýrstaryn tıimdi basqarýǵa jáne olardy qorǵaýǵa basa nazar aýdarý kerek. Osy jumysta ǵylymı ustanymdy, ınovasıany, halyqaralyq ozyq tájirıbeni basshylyqqa alǵan abzal. Bizdiń elde sýdyń 65 paıyzy aýyl sharýashylyǵy salasyna jumsalady. Sonyń 60 paıyzǵa jýyǵy qumǵa sińip ketedi. Mundaı ysyrapshyldyqqa jol berýge bolmaıdy.Jańa tarıf saıasatyna kóshý qajet. Ony dereý qolǵa almasaq, ahýal odan ári kúrdelene túsetini anyq», - dedi Qasym-Jomart Toqaev.
Memleket basshysy sýmen jabdyqtaý nysandaryn jáne barlyq sý salasyn sıfrlandyrý zor mańyzǵa ıe ekendigin atap ótti. Sýarý arnalaryn jappaı jańǵyrtý, gıdırotehnıkalyq qurylystardy derbes basqarýǵa kóshý, sý resýrstaryn paıdalanýǵa kvota engizý, sýdy esepke alýdy avtomattandyrý kerektigin toqtaldy.
«Bul máselelerdiń barlyǵy sapaly normatıvtik-quqyqtyq jáne zańnamalyq qamtamasyz etýdi talap etedi»,- dedi Prezıdent.