WhatsApp onlaın-alaıaqtar úshin barǵan saıyn tanymal quralǵa aınalýda. Olar zamanaýı aldaý tásilderin belsendi qoldanyp júr, olardyń biri — steganografıa.
Bul qalaı jumys isteıtinin Stopfake.kz saıty málimdedi, dep habarlaıdy aqshamnews.kz.
2025 jylǵy sáýirde Hindustan Times jańalyqtar portaly Úndistannyń Djabalpýr qalasynda oryn alǵan oqıǵa týraly habarlady. Qala turǵyny WhatsApp arqyly beıtanys nómirden kelgen sýret faılyn ashqan soń, iri kólemde aqshasynan aıyrylǵan.
Alaıaqtar grafıkalyq faıldardyń ishine zıandy kodtardy jasyryn túrde engizýge múmkindik beretin steganografıa tehnologıasyn paıdalanǵan. Mundaı sýretter syrt kózge qarapaıym bolyp kórinedi, biraq ashqannan keıin ol qurylǵyǵa zıandy baǵdarlamany avtomatty túrde ornatýy múmkin. Bul baǵdarlama qupıa aqparattaryńyzǵa: bank esepshottaryna, qupıa sózderge, habarlamalarǵa, tipti qurylǵyny tolyq qashyqtan basqarýǵa múmkindik beredi.
2025 jylǵy 25 sáýirde WhatsApp provaıderi GREEN-API bul qater týraly resmı eskertý jasady.
«WhatsApp-tyń Windows nusqasynda (CVE-2025-30401) osaldyq anyqtaldy. Bul osaldyq zıandy faıldy ashýǵa ıtermeleý arqyly BQ iske qosýǵa múmkindik beredi. Bul osaldyqtyń GREEN-API servısine qatysy joq, ol tek Windows-qa arnalǵan WhatsApp qosymshasyna ǵana qatysty», — delingen resmı habarlamada.
Paıdalanýshylarǵa qosymshany jańartýǵa jáne faıl alǵan kezde óte saq bolýǵa keńes berildi.
«WhatsApp-ta tanys adamdardan kelgen faıldardy asharda da óte muqıat bolyńyz. Faıldyń keńeıtimin (formatyn) tekserińiz. Eger keńeıtilýi kúmándi bolsa (mysaly, “.exe”, “.vbs”, “.scr”) — ashpańyz.
Qazirgi derekqorlarmen jańartylǵan antıvırýstyq baǵdarlamalardy paıdalanyńyz. Bul zıandy faıl arqyly taralatyn vırýstardan qurylǵyńyzdy qorǵaýǵa kómektesedi», — delingen GREEN-API saıtyndaǵy eskertýde.
Sondaı-aq WhatsApp qosymshasynyń resmı saıtynda faıl jiberýshiniń senimdiligin tekserý qajettigi únemi eskertiledi.
Internette shynaıy kıbershabýyldarmen qatar, jalǵan habarlamalar da jıi taratylady. Mysaly, 2022 jyly WhatsApp-ta qaıyrly tań nemese jaqsy kún tilegen sýretterde fıshıng kodtary bar degen jalǵan aqparat keń taraǵan. Bul málimet shyndyqqa janaspaıtyny dáleldenip, resmı túrde joqqa shyǵarylǵan bolatyn.