Ózbekstan astanasy Tashkent qalasynda karateden ótip jatqan Azıa chempıonatynda qazaqstandyq sportshylar top jardy, dep habarlaıdy aqshamnews.kz.
Sportty damytý dıreksıasynyń baspasóz qyzmetiniń málimedeýinshe, aldymen Jolaman Bıǵabyl kýmıte baǵdarlamasynda 55 kelige deıingi salmaqta fınalda jarys qojaıyny Sobıthon Qosımovty tize búktirdi.
Eresekter arasynda alǵash ret qurlyqtyq dodaǵa qatysyp jatqan Daııana Darenskaıa 68 kelige deıingi salmaqta sońǵy básekede japon sportshysy Kama Sýbasany jeńdi.
Budan keıin tatamıge shyqqan álem chempıonatynyń qola júldegeri Nurqanat Ájiqanov (-75 kg) ırandyq qarsylasyna esh múmkindik bergen joq. Osylaısha, Nurqanat Azıa birinshiliginde qatarynan úsh ret jeńimpaz atandy. Al Tokıo Olımpıadasynyń qola júldegeri Sofá Berýlseva (+68 kg) fınalda taǵy bir japon karateshisi Sýmıre Sýgıtany jeńdi.
Endi Qazaqstan áıelder komandasy aqtyq synda altyn úshin talasady.
Erler quramasy qola júlde úshin básekede Saýd Arabıasy ókilderin 3:2 esebimen jeńdi. El namysyn Dıdar Ámiráli, Nurqanat Ájiqanov, Ábilmansur Batyrǵalı, Shyńǵys Taılıev, Nıkıta Tarnakın, Danıar Iýldashev, Ǵalym Asylhan jáne Dıas Anarbekov qorǵady. Sondaı-aq álem chempıony Móldir Jańbyrbaı taǵy bir qola júldege qol jetkizdi.