Bul týraly banktiń baspasóz qyzmeti málimdedi.
Buǵan deıin Kaspi Biz Birgemiz Qazaqstan qory arqyly 620 mln teńge bóldi, dep habarlaıdy Almaty-akshamy.kz.
Kaspi.kz-tiń negizin qalaýshylar Vácheslav Kım men Mıhaıl Lomtadze sý tasqynynan zardap shekken qazaqstandyqtarǵa kómektesý úshin 20 mıllıard teńge bóledi. Qarajat Soltústik Qazaqstan jáne Aqmola oblystarynda turǵyn úılerdi jóndeýge, satyp alýǵa jáne salýǵa jumsalady.
Kaspi.kz Dırektorlar keńesiniń tóraǵasy jáne negizin qalaýshylardyń biri Vácheslav Kım:
«Baspanasyz qalǵan adamdar úshin búkil elimizben birge ýaıymdaımyz. Myńdaǵan otbasylar kóshirildi, olar óz úılerine qashan oralatyny belgisiz. Keıbir eldi mekenderde sý áli de kóterilip jatyr. Bul apat eshkimdi beıjaı qaldyrmaıdy. Memleket, bıznes jáne bizdiń azamattar zardap shekken aımaqtardaǵy adamdardyń ómirin qalpyna keltirý úshin baryn salýda. Biz Memleket basshysynyń zardap shekkenderge kómek kórsetý týraly shaqyrýyna qoldaý kórsetip, sý tasqynynyń saldaryn joıýǵa 20 mıllıard teńge baǵyttaımyz».
Kaspi.kz Basqarma tóraǵasy jáne negizin qalaýshylardyń biri Mıhaıl Lomtadze:
«Zardap shekken aımaqtarda bizdiń súıikti klıentterimiz, seriktesterimiz, qyzmetkerlerimiz turady. Biz sý tasqynynyń alǵashqy kúnderinen bastap olarmen únemi baılanystamyz jáne jaǵdaıdy jaqsy bilemiz. Biz birden Kaspi.kz mobıldi qosymshasynda qaıyrymdylyq kómegin jınaýdy uıymdastyrdyq jáne Biz Birgemiz Qazaqstan qoryna qutqarý tehnıkasyn, jabdyqtar amýnısıany, janarmaı jáne basqa da alǵashqy kómekke qajetti zattardy satyp alýǵa qarajat aýdardyq. Ókinishke qaraı, birqatar aımaqtarda jaǵdaı áli de qıyn. Biz Prezıdenttiń bastamasyn qoldaý jáne osy qıyn sátte elge paıdaly bolý ózimizdiń azamattyq boryshymyz dep esepteımiz».
Naýryz aıynyń sońynda Kaspi komandasy Kaspi.kz qosymshasynda onlaın-qyzmet uıymdastyrdy. Onyń kómegimen jaǵdaıǵa beı-jaı qaramaıtyn árbir qazaqstandyq zardap shekkenderge kómektesý úshin Biz Birgemiz Qazaqstan qoryna qarajat aýdara alady. Kaspi.kz kompanıasynyń ózi joldardy jóndeýge, qutqarý tikushaqtarynyń jumysyn qamtamasyz etýge, generatorlardy, sorǵylardy, úrlemeli qaıyqtar men dári-dármekterdi satyp alýǵa qorǵa 620 mln teńge baǵyttady. Sondaı-aq, ótken aptada Vácheslav Kım Aqmola oblysynda 5 qabatty turǵyn úı qurylysynyń jobasyn qarjylandyrdy jáne zardap shekken eldi mekenderdiń ınfraqurylymyn qalpyna keltirýge qarajat bóldi.