Qytaıtanýshy N.Muqamethanulymen kezdesý ótti
Qazirgi tańda Qazaqstandy qamtyǵan Ortalyq Azıa aımaǵynda ıslam áleminiń, Qytaı men Úndistan syndy syrtqy jańa kúsh ortalyqtarynyń belsendiligi barǵan saıyn artýda. Bul úrdis elimizdegi shyǵystaný jáne qytaıtaný ǵylymyn júıeli damytýdy mindettep otyr. Búgin, 17 sáýirde Almatyda belgili qytaıtanýshy ǵalym Nábıjan Muqamethanulymen atalǵan saladaǵy zertteýshiler jáne jas ǵalymdardyń kezdesýinde osyǵan qatysty tyń usynystar men jańa oılar ortaǵa salyndy.
R.B.Súleımenov atyndaǵy Shyǵystaný ınstıtýty uıymdastyrǵan kezdesý belgili ǵalym, QR UǴA Qurmetti akademıgi, tarıh ǵylymynyń doktory, profesor Nábıjan Muqamethanulynyń mereıli 70 jasyna oraı ótkizildi. Kezdesýde otandyq shyǵystaný jáne qytaıtaný salasynyń maqsaty men mindetteri, salanyń damýy men kezdesip otyrǵan máseleleri talqylandy. Atalǵan ǵylym baǵytyndaǵy zertteýshiler, ǵalymdar jáne stýdentter arasynda ózara pikir almasty.
Shara barysynda Shyǵystaný ınstıtýtynyń dırektory, belgili ǵalym Dúken Másimhanuly ǵylymdaǵy áriptes aǵasy N.Muqamethanulynyń ómirbaıany, ǵylymdaǵy eńbek jolymen tanystyryp, mereıli 70 jasymen quttyqtady. Ári ınstıtýt atynan «Shyǵystaný ǵylymyna qosqan úlesińiz úshin» medalin taǵyp, ǵalymnyń ǵylymdaǵy eńbegine qurmet kórsetti.
Kezdesýde ǵalym elimizdegi qytaıtaný jáne shyǵystaný salalarynyń máselelerin taldady. Salany damytý boıynsha oılary men usynystaryn ortaǵa saldy. Ári jas zertteýshilerdiń suraqtaryna jaýap berip, elimizdiń ulttyq múddesine qatysty, sondaı-aq, birqatar geosaıası máseleler boıynsha da óz kózqarastarymen bólisti.
N.Muqamethanulymen kezdesýde Qazaq-qytaı qarym-qatynasynyń bolashaǵy, Reseı-Qytaı qatynastarynyń damýy jáne onyń bizge jasaıtyn yqtımal múmkindikteri men syn-qaterleri týraly da keń talqy óristedi. Bul týraly tolyǵyraq «Almaty aqshamy» basylymynyń aldaǵy sanynan oqı alasyzdar.