Turǵyndar óz baspanasyn tastap ketýge májbúr
Almaty oblysynyń Uzynaǵash aýylynda 50-ge jýyq úıdiń aýlasyn sý alyp, keı baspananyń qabyrǵasy ajyraǵan, dep habarlaıdy Almaty-akshamy.kz Almaty.tv-ge silteme jasap.
Qys aıaǵy qyjalat boldyq degen dúıim el bılik ókilderi áli kelip kómek bermedi dep otyr. 50 myńǵa jýyq halqy bar Uzynaǵashta bul jaǵdaı jylda qaıtalanady deıdi jurt.
Qyzyl sý turǵyndardy ábigerge salǵaly aıdan asypty. Tipti baspanasyn tastap ketýge májbúr bolǵandar bar. Tórt balanyń anasy Tańnur Turlybaeva qazir páter jaldaýyma týra keldi deıdi.
«Meniń úıimdi 4 jyldan beri sý basyp keledi. Úıdiń irgetasy ajyrap, kirpishteri ashylyp, qulaıyn dep tur», – deıdi Uzynaǵash aýylynyń turǵyny Tańnur Turlybaeva.
Tirnektep taýyp, qazyǵyn qaǵyp salǵan tamdy satýǵa da qoıdym. Biraq úıdi kórýge kelgender syrtynan-aq teris aınalady deıdi.
«Ákimdik bizge qalaı da sheshimin taýyp bersin. Balalarǵa obal boldy, keshe balam sý bolyp keldi. Kıimin qashanǵy keptire beremiz, balam aýyratyn boldy», – deıdi Uzynaǵash aýylynyń turǵyny Quralaı Pishaıynova.
Uzynaǵash halqy bul máseleni meńzep, bılikten kómek suraǵaly da jyldar bolǵan eken. Ákimdik ókilderi de sý basqan úılerdiń baryn rastaıdy. Alaıda aldyn alý sharasynyń júrgizilmeýin bylaı dep syltaýratyp otyr.
«Osy kúnge deıin tazartylmaǵan. Jerdiń beti toń bolǵandyqtan, tehnıka jerdi qazý jumystaryn júrgize almady. Sonyń saldarynan osyndaı jaǵdaıǵa tap boldyq», – deıdi Jambyl aýdany ákiminiń orynbasary Abzal Nurpeıisov.
Búginde elý myń halqy bar eldi mekenge oblystyq qutqarý qyzmeti, áskerı qyzmetkerlerdi qosqanda júzge tarta jumysshylar apattyń aldyn alý úshin jumyldyrylǵanyn aıtady aýyl ákimi.
«Ár turǵynǵa tótenshe jaǵdaı týraly eskertildi. Úılerdi sý basqan joq, tek aýlany ǵana basty. Saraptama jasap jatqanymyzǵa 15 kún boldy», – dedi Uzynaǵash aýyldyq okrýginiń ákimi Baqyt Beısenbekov.
Búginde Uzynaǵash aýyldyq okrýgi boıynsha 10 shaqty iri tehnıka, 5 motosorǵysh, 2 ekskavator aryq arnalaryn ashýǵa kirisipti. Alaıda erigen qar sýynyń mólsheri kóp bolǵandyqtan, úlgermeı jatyrmyz dep sendirdi.