Úndistanda tarala bastaǵan qaýipti vırýstan kóz jumǵandar bar
Dúnıejúzilik densaýlyq saqtaý uıymynyń málimeti boıynsha, bul indetke shaldyqqandardyń 40-tan 75 paıyzyna deıin ólim qushý qaýpi bar, dep habarlaıdy Almaty-akshamy.kz 24.kz-ke silteme jasap.
Qazir eń qaterli aımaq Kerala shtaty bolyp tur. Munda 11 naýqas anyqtalǵan. Birer kún buryn ǵana atalǵan aımaqta nıpahtan 12 jastaǵy er bala qaıtys boldy. Jańa indettiń taralýyna baılanysty birneshe shtatta qaýipsizdik sharalary kúsheıtildi. Epıdemıologtar eń úlken qaýip balalarǵa tónýi múmkin dep dabyl qaǵýda.
Kerala shtatyndaǵy aýrýhanada ata-analardyń zary men balalardyń janaıqaıynan qulaq tunady. Qaterli vırýs Kojıkode qalasyn úreı qushaǵynda ustap otyr. Dárigerlerdiń aıtýynsha, 11 naýqastyń hali múshkil. Aldynda 38 adam oqshaýlanǵan edi, búgin olardyń sany 3 ese artty. Balalaryn jetektegen júzdegen turǵyn emhanalardyń tabaldyryǵyn tozdyryp júr. 12 jastaǵy balanyń ólimi turǵyndaryn úreıin ushyryp otyr.
«Balamnyń temperatýrasy joǵary bolyp tur. Basy da qatty aýyrady. Kórshim nıpahtan kóz jumǵan álgi balanyń aýrýy da osylaı bastalǵan dep shoshytyp qoıdy», - dedi Kojıkode turǵyny Sandesh Padıta.
«Aýrýhanaǵa kelgen barlyq adamdy tekseremiz, analızderin alamyz. Bul indetti birden anyqtaý qıyndaý. Nátıjeni Nú-Delıge, zertteý ortalyqtaryna jiberemiz. Kelgenderdiń kóbi tumaýratyp, basynan kún ótip, basqa aýrýǵa shaldyqqandar. 3 er adamnan koronavırýs anyqtaldy. Olardy oqshaýladyq», - deıdi Kojıkode ortalyq aýrýhanasynyń dáriger-epıdemıology Lata Hemgala.
Nıpah vırýsy tamaq arqyly janýardan jáne adamnan adamǵa juǵady. Ázirge odan emdeıtin eshqandaı dári joq. Bul indet Kerala shtatynda 2018-2019 jyldary taralyp, biraz adam ajal qushqan bolatyn.
Jergilikti sheneýnikterdiń aıtýyna qaraǵanda, jaǵdaı Úndistan Prezıdentiniń tikeleı nazarynda. Úkimet indet taralǵan qalany ǵana emes, tutas shtatty, sondaı-aq onymen shektes 3 aımaqty qatań baqylaýǵa alǵan.