Almatydaǵy Kardıologıa jáne ishki aýrýlar ǵylymı-zertteý ınstıtýtynda Eýropanyń (Brıstol júrek ınstıtýty, Ulybrıtanıa) jetekshi ıntervensıalyq kardıology Djýlıan Strendjdiń qatysýymen júrek tamyrlarynyń zaqymdanýynyń kúrdeli formalary – sol jaq koronarlyq arterıa dińi, júrek tamyrlarynyń kalsılengen zaqymdanýlary boıynsha sheberlik sabaǵy ótti.
ǴZI-nyń rentgenoperblok meńgerýshisi Alekseı Kolesnıkovtyń aıtýynsha, koronarografıa jasaý kezinde pasıentterdiń 10-20%-nda júrek tamyrlarynyń sozylmaly oklúzıasy anyqtalady. Koronarlyq arterıanyń sozylmaly oklúzıasynda júrek bulshyqetin qanmen qamtamasyz etetin tamyr tolyǵymen jabylyp qalady. Júrek jetkilikti ottegin almaıdy, bul ómir sapasynyń tómendeýine, entigýge ákeledi.
«Koronarlyq arterıalardyń kúrdeli jáne kalsılengen zaqymdanýy koronarlyq stentteý kezinde asqyný qaýpin arttyrýy múmkin. Sondyqtan ońtaıly tehnıka men quraldardy tańdaý bul prosedýranyń mańyzdy aspektisi bolyp tabylady. Biz jasap jatqan operasıalar – eń kúrdeli jaǵdaılar. Biraq biz táýekelderdi barynsha azaıta otyryp, pasıent úshin mundaı aralasýlardy múmkindiginshe qaýipsiz júrgizýdi úırendik. Osy oraıda qazaqstandyq dárigerlerdiń joǵary deńgeıi men tájirıbesin atap ótkim keledi», – deıdi Djýlıan Strendj.
Sozylmaly jalpy oklúzıalar men koronarlyq arterıalardyń kalsılengen zaqymdanýlaryn emdeýdegi jańa tendensıalar týraly demonstrasıalyq operasıalar men teorıalyq sabaqtardy ótkizýmen tájirıbe almasý mamandarǵa jańa jabdyqta jumys isteýdi úırenýge, kásibı qyzmette qajetti daǵdylardy jetildirýge múmkindik beredi.
Sonymen qatar, klınıkanyń rentgenhırýrgtary aorta qaqpaqshasynyń aýyr stenozymen 90 jastaǵy naýqasqa TAVI (qolqa qaqpaqshasyn endovaskýlárlyq aýystyrý) operasıasyn jasady. Mundaı naýqastarǵa qolqa qaqpaǵyn aýystyrý úshin kardıohırýrgıalyq operasıalar jasaýǵa bolmaıdy, óıtkeni olardyń kenetten qaıtys bolý qaýpi joǵary. TAVI – qolqa qaqpaǵyn jasandy bıologıalyq klapanmen aýystyrýdyń zamanaýı, az ınvazıvti ádisi. Operasıadan keıin naýqas ózin jaqsy sezinedi. Barlyq kórsetkish qalypty shekte, otadan keıingi asqynýlar bolǵan joq.
Marat PASHIMOV, Kardıologıa jáne ishki aýrýlar ǴZI-nyń basqarma tóraǵasy:
– Bul sheberlik sabaǵy sony úlgidegi ROTA PRO júrek tamyrlaryn rotablasıalaý júıesin paıdalana otyryp ótkizildi. Atalǵan júıe elimizde alǵash ret qoldanylýda. Bul bizge eń kúrdeli patologıalary bar naýqastardy emdeýge kómektesedi. Koronarlyq arterıalardyń kalsılengen zaqymdanýlary jáne sozylmaly jalpy oklúzıalary bar pasıentterge teri arqyly koronarlyq aralasýlar júrgizildi. Sheberlik sabaǵyna Almaty qalasynyń ıntervensıalyq kardıologtary qatysty. Sóıtip megapolıs dárigerleri kásibı jáne klınıkalyq tájirıbe almasýǵa múmkindik aldy. Bul biz úshin úlken jetistik.