2023 jyly jáne 2024 jyldyń birinshi toqsanynda ataýly áleýmettik kómek alǵan 58 445 otbasy memlekettik qoldaý sharalarynyń arqasynda kedeılik jaǵdaıynan shyǵyp otyr.
2023 jyly jalpy somasy 59,4 mlrd teńgege 114,1 myń otbasy (598,4 myń adam), 2024 jyldyń úsh aıynda 7,8 mlrd teńgege 58,8 myń otbasy (312 myń adam) AÁK aldy, dep habarlaıdy Almaty-akshamy.kz QR Eńbek jáne áleýmettik qorǵaý mınıstrligine silteme jasap.
Ótken jyldyń qorytyndysy boıynsha óńirlik bóliniste AÁK alýshylardyń eń kóp sany Túrkistan oblysynda – 27 myń otbasy (23,7%), Shymkent qalasynda – 12,7 myń otbasy (11,2%), Almaty – 9,5 myń otbasy (8,3%), Qyzylorda oblystarynda – 9,4 myń otbasy (8,2%).
AÁK alýshylardyń eń az sany Ulytaý – 538 otbasy (0,5%), Atyraý – 1,1 myń otbasy (0,9%), Soltústik Qazaqstan oblystarynda – 1,6 myń otbasy (1,4%) baıqalyp otyr.
AÁK alýshylardyń qurylymynda basym kópshiligi balalardyń úlesine keledi – 65,4% nemese 391,2 myń adam, jumys isteıtin azamattar – 15,1% nemese 90,6 myń adam; balalardy, qarttardy jáne múgedektigi bar adamdardy kútetin adamdar – 12,4% nemese 74,2 myń adam; qalǵan 7,1%-y azamattardyń basqa sanattaryna jatady.
AÁK-niń negizgi maqsaty – aqshalaı tólemder túrindegi qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý.
AÁK kelesilerdi kózdeıdi:
- tabysy óńirlik eń tómen kúnkóris deńgeıiniń 70%-nan aspaıtyn azamattarǵa toqsan saıyn áleýmettik kómek taǵaıyndaý;
- 1 jastan 6 jasqa deıingi tabysy az otbasylardaǵy ár balaǵa 1,5 AEK mólsherinde aı saıynǵy qosymsha tólem berý.
- jumysqa ornalastyrý jolymen jumyspen qamtýǵa járdemdesý, oqýǵa jiberý, óz isin ashýǵa yntalanǵan otbasylarǵa granttar berý jáne t.b.
Mysaly, Aqtóbe oblysynda kópbalaly otbasy memlekettik qoldaý sharalary aıasynda 2023 jyldyń qyrkúıeginde 400 AEK nemese 1 mln 380 myń teńge kóleminde qaıtarymsyz grant alyp, shaǵyn naýbaıhana ashty.
«Biz kúıeýim ekeýmiz 6 bala tárbıelep otyrmyz, jubaıym «Qazposhta» AQ-da jumys isteıdi. Biz 2018-2019, sondaı-aq 2022-2023 jyldary AÁK alýshy boldyq. 2023 jyly qaıtarymsyz grant alǵannan keıin men jeke kásipker retinde tirkeldim. Sondaı-aq, 2 adamdy turaqty jumyspen qamtyp otyrmyz», – dedi Aqtóbe oblysy Shalqar qalasynyń turǵyny Janargúl Naǵımetova.
Qostanaı oblysynyń turǵyny Krıstına Rogojnıkova da qaıtarymsyz grant alyp, óz kásibin bastady. Ol otbasymen birge 2021 jyldan 2023 jylǵa deıin AÁK alyp kelgen.
«Men manıkúr salasyna kelýdi kópten beri oılastyryp júrdim, sebebi ózimdi dál osy baǵytta synap kórgim keldi. Mansap ortalyǵynda maǵan keńes berildi, sodan keıin «Bastaý bıznes» baǵdarlamasy boıynsha oqýdan óttim. Ári qaraı men 1 mln 380 teńge kóleminde grant alyp, kabınet ashyp, jumys bastap kettim», – dedi kásipker kelinshek.