Ispanıanyń Pontevedre qalasynda ótip jatqan kúres túrlerinen 20 jasqa deıingiler arasyndaǵy álem birinshiliginde kók baıraǵymyzdy jelbiretip, ánuranymyzdy áýeletken «Dınamo» sport qoǵamynyń sportshylary, Ultyq ulannyń merzimdi qyzmettegi áskerı qyzmetshileri qatardaǵy Islam Evloev pen Aıbek Aıtbekov elge oraldy, dep habarlaıdy aqshamnews.kz.
Balýandardy tańǵy saǵat 08.20-da Almaty halyqaralyq áýejaıynan «Dınamo» sport qoǵamy, Ulttyq ulannyń «Ońtústik» óńirlik qolbasshylyǵynyń áskerı qyzmetshileri jáne sport súıer qaýymmen birge jerlesteri áskerı orkestrmen kútip aldy.
Baıraqty básekeni Qazaqstan quramasy 1 altyn 1 kúmis jáne 3 qola medalmen qorytyndylady. Qazaqstan komandasynyń quramynda Ulttyq ulanynyń áskerı qyzmetshileri de óner kórsetti.
Týrnırde 82 kelige deıingi salmaqta synǵa túsken ulandyq jaýynger Islam Evloev jastar arasynda álem chempıony atanyp, boz kilemde qazaq eliniń abyroıyn asqaqtatty. Al Aıbek Aıtbekov 55 keli salmaqta synǵa túsip, úshinshi oryndy ıelendi.
- Úlken qoshemetpen qarsy alyp jatqan elime, «Dınamo» sport qoǵamy men ózim boryshymdy ótep júrgen Ulttyq ulan basshylyǵyna alǵys aıtamyn! Óte keremet sezimde turmyn. Sózben aıtyp jetkizý múmkin emes. Bul jarysqa jaqsy daıyndyqpen bardym. Maǵan qoldaý bildirip, jankúıer bolǵan barsha otandastaryma alǵysym sheksiz, – deıdi ulandyq chempıon Islam Evloev.
Aıbek Aıtbekov.
Bul onyń álem chempıonatyna ekinshi ret qatysýy. Alǵash ret 2019 jyly Vengrıanyń Býdapesh qalasynda ótken chempıonatqa qatysqan bolatyn.
Chempıon Qazaqstan Respýblıkasynyń İİM men Ulttyq ulan Bas qolbasshysyna jáne «Dınamo» sport qoǵamynyń basshylyǵyna ózine únemi qoldaý kórsetip, sportpen aınalysýǵa jaǵdaı jasap kele jatqanyna alǵys bildirdi.
Aıta keteıik, Islam Evloev áskerı boryshyn Petropavlda, al Aıbek Aıtbekov Almatydaǵy Baýyrjan Momyshuly atyndaǵy 5571 áskerı bóliminde óteýde.