Dollardyń resmı baǵamy 8 shildede 477,24 teńgeni qurady.
Ulttyq banktiń monetarlyq operasıalar departamentiniń dırektory Nurjan Tursynhanov valúta naryǵyndaǵy qazirgi jaǵdaı týraly túsindirdi, dep habarlaıdy Almaty-akshamy.kz QazAqparatqa silteme jasap.
Onyń paıymynsha, damyǵan jáne damýshy elderdiń valútalary ınflásıa men geosaıası turaqsyzdyqqa qarsy kúres aıasynda qysymǵa ushyrap otyr. Ulttyq valúta da ornyǵyp qalǵan ishki faktorlarǵa baılanysty jáne syrtqy ózgeristerdiń áserinen qubylmaly kúı keshýde.
«Dollardyń resmı baǵamy aı basynan beri 12,16 teńgege nemese 2,6%-ǵa álsirep, 8 shildede 477,24 teńgeni qurady. Bul oraıda, AQSH dollarynyń jahandyq nyǵaıýy, energıa tasymaldaýshylar baǵasynyń tómendeýi, sondaı-aq Qazaqstandaǵy Kaspıı qubyry jelisi konsorsıýmynyń teńiz termınaly qyzmetin toqtata turý táýekelderi, sol sebepten naryqqa qatysýshylar sentımentiniń nasharlaýy, qazaqstandyq kompanıalardyń ımporttyq operasıalary teńge dınamıkasyna áser etken negizgi faktorlar boldy. AQSH qazynashylyq oblıgasıalary kiristiliginiń ósýi men AQSH dollarynyń nyǵaıýy damyǵan, sol sıaqty damýshy elderdiń valútalaryna qysym jasady», - dedi ol.
Nurjan Tursynhanovtyń málimetinshe, DXY ındeksi 7 shildede 107,13 deńgeıine deıin, ıaǵnı 2,3%-ǵa ósti, al JPMorgan damýshy elderi valútalarynyń ındeksi 3,3%-ǵa álsiredi. Eýronyń AQSH dollaryna qatysty 1,016 deńgeıine deıin álsireýi shamamen tepe-teńdikke jetip, eleýli jaǵdaı oryn aldy.
«7 shildedegi jaǵdaı boıynsha, Brent markaly munaı baǵasy aı basynan beri 8,8%-ǵa tómendep, barreline 104,65 AQSH dollaryn qurady. Máskeý bırjasyndaǵy Reseı rýbliniń baǵamy aı basynan beri 20%-ǵa álsirep, 61,95 deńgeıinde qalyptasty. İshki faktorlar arasynda ımporttyq operasıalardy júzege asyrý úshin valútaǵa saqtalyp otyrǵan suranys, syrtqy boryshtardy óteý, sondaı-aq jeke tulǵalar tarapynan shetel valútasyna turaqty suranys teńge dınamıkasynyń negizin qalady», - dedi Ulttyq bank ókili.
Jalpy alǵanda, energıa tasymaldaýshylar baǵasynyń tómendeýine baılanysty naryqqa qatysýshylar sentımentiniń nasharlaýy baıqalady.
Erkin ózgermeli baǵam jaǵdaıynda teńge úshin qubylmalylyqtyń oryn alýy – naryqtaǵy qalypty jaǵdaı.
Mamannyń aıtýynsha, aı basynan beri Ulttyq bank valútalyq ıntervensıalar júrgizgen joq. Bul rette qarjylyq turaqtylyqqa tónetin qaýipti boldyrmaý úshin vedomtsvo shamadan tys baǵam qubylmalyǵy kezinde valúta saýda-sattyǵyna aralasý quqyǵyn ózine qaldyrady.
«Qysqa merzimdi perspektıvada teńge dınamıkasy ımporttyq operasıalar men demalys maýsymy aıasynda qatysýshylar tarapynan shetel valútasyna suranystyń artýyna baılanysty bolady. Kórshiles óńirlerdegi geosaıası ahýal, sondaı-aq álemdik naryqtardaǵy jaǵdaılar damýshy elderdiń valútalaryna qatysty ınvestorlardyń jalpy sentımentine yqpalyn saqtaıdy», - dedi Nurjan Tursynhanov.
Ulttyq bank teńgerimsizdikterdiń jınaqtalýyn boldyrmaıtyn jáne altyn-valúta rezervteriniń saqtalýyn qamtamasyz etetin ıkemdi baǵam belgileý rejımin ustanýdy jalǵastyra beredi.