«Neonataldy qarqyndy terapıadaǵy ózekti máseleler» taqyrybynda 5 kúndik halyqaralyq klastaǵy sımýlásıalyq trenıń aıaqtaldy.
Halyqaralyq trenıń Perınatologıa jáne balalar kardıohırýrgıasy ortalyǵynda ótti, dep habarlaıdy Almaty-akshamy.kz.
İs-sharaǵa qaladaǵy barlyq perzenthanalardyń, perınataldyq ortalyqtardyń, akýsherlik jáne gınekologıa ǵylymı ortalyǵynyń balalar reanımatologtary men anestezıologtary, neonatologtary, sondaı-aq balalar aýrýhanalarynyń qyzmetkerleri qatysty.
Trenıń aıasynda kóptegen máseleler talqylandy. Mysalǵa alsaq: ókpeniń ınvazıalyq jeldetilýi negizderi, tynys alý mehanıkasy, gaz almasýdyń patofızıologıasy, respıratorlyq qamtamasyz etý ádisteri men rejımderiniń jiktelimi, adaptive, set-point targetteý ádisimen basqarylatyn qysymmen ókpeni jeldetý, ınvazıvti emes respıratorlyq qoldaýdy qamtamasyz etý jáne monıtorıń, neonatologıadaǵy ártúrli patologıalar kezindegi ınvazıvti respıratorlyq qoldaýdyń erekshelikteri jáne ózge de máseleler.
Bas dárigerdiń neonatologıa boıynsha orynbasary Elena Plýjnıkova atap ótkendeı, bul oqytý óte tıimdi, óıtkeni teorıa praktıkamen ushtasty.
«Barlyq 5 kún boıy bir jaǵynan jańa týylǵan, ásirese ekstremaldy dene salmaǵyndaǵy nárestelerdegi ókpeniń jasandy jeldetilýi salasyndaǵy aldyńǵy qatarly halyqaralyq zertteýlerdiń materıaldaryn paıdalana otyryp, teorıa júrgizildi. Bul taqyryp boıynsha óte keń, kólemdi materıal usynyldy, ekinshi jaǵynan, praktıkalyq trenıńter kún saıyn ótkizildi, ıaǵnı aparatýra naqty jumys rejıminde shynymen qoldanyldy, onyń aıasynda tájirıbedegi ártúrli rejımderdi tekserýge bolady. Bul bizge ásirese jańa týǵan nárestelerge arnalǵan neonatologıa salasynda qoldanylatyn zamanaýı tehnıkada, zamanaýı ÓJJ apparattardyń múmkindikterin tereńirek túsinýge múmkindik berdi. Rasynda, tehnıka jetilýde jáne zaman aǵymyna ilese júrý kerek. Joǵary klastaǵy aparatýra kelgen kezde, negizgi rejımder men baptaýlardan basqa, pasıentti oǵan arnalǵan jeke rejımde júrgizýge, osy naqty pasıent úshin eń qolaıly parametrlerdi tańdaý múmkindigi bolady - bul óte mańyzdy jáne osy oqý bizge osyny berdi. Iaǵnı, biz zamanaýı tehnıkamyzdyń múmkindikterin keńirek jáne tereńirek paıdalana alamyz, jeke pasıentterdegi ártúrli patologıalyq jaǵdaılardy eskere otyryp, parametrlerdi retteı alamyz. Keıinnen bul, árıne, nárestelerge kútim jasaý sapasyna áser etedi, tipti nárestelerdiń ókpeni jasandy jeldetý apparatyndaǵy kúnderin aıtarlyqtaı azaıtady. Al bul óte mańyzdy, bala apparatta qanshalyqty az jatsa, soǵurlym tezirek beıimdelip, ózdiginen tynys alýǵa aýysa alady, bul bolashaqta onyń densaýlyǵyna áldeqaıda jaqsy boljam jasaýǵa yqpal etedi», - dep atap ótti dáriger.