Premer-mınıstr Oljas Bektenovtiń tóraǵalyǵymen ótken Úkimet otyrysynda jylytý maýsymyndaǵy órt qaýipsizdigi máselesi qaraldy.
Tótenshe jaǵdaılar mınıstri Shyńǵys Árinov aldyn alý jumystary týraly aıtty, sondaı-aq birqatar óńir ákimderi baıandama jasady, dep habarlaıdy aqshamnews.kz Primeminister.kz-ke silteme jasap.
TJM málimetinshe, bıyl qazan aıynyń basynan beri turǵyn úı sektorynda oryn alǵan 650-den astam órt tirkelgen. Negizgi sebepterdiń biri – jylý júıeleri men elektr qurylǵylaryn paıdalaný erejeleriniń buzylýy. Shyńǵys Árinov óńirler boıynsha Qostanaı, Qyzylorda jáne Abaı oblystarynda órttiń kóbeıip otyrǵanyn baıandady.
Premer-mınıstr profılaktıkalyq jumysty kúsheıtý jáne qaýipsizdik talaptarynyń saqtalýyn baqylaý qajettigine nazar aýdardy.
«Jylý berý kezeńinde órtterdiń 50%-ǵa jýyǵy peshter men murjalardaǵy aqaýlardyń kesirinen oryn alady. Alaıda, órttiń negizgi shyǵý sebebi jylytý peshteri men qazandyqtardy paıdalaný kezinde órt qaýİpsizdigi erejelerin óreskel buzý bolyp otyr. Tótenshe jaǵdaılar mınıstrligi osyǵan basa nazar aýdaryp, mundaı buzýshylyqtarǵa beı-jaı qaramaýǵa tıis. Tek usynym berýmen ǵana shektelýge bolmaıdy. Ol úshin gaz-tehnıkalyq ınspeksıanyń ókilettigin kúsheıtý kerek», — dep atap ótti Oljas Bektenov. Ákimdikterge TJM - men birlesip turǵyn úı sektorynda barlyq jerde órt qaýipsizdigi aılyǵyn uıymdastyrý jóninde tapsyrma berildi.
Premer-mınıstr halyqtyń áleýmettik osal toptaryn tegin gaz dachıkterimen qamtamasyz etý mindetin qoıdy. Mundaı úıler esepke alynyp, olar erekshe baqylaý aımaǵynda bolýy tıis. Ásirese Jetisý, Aqmola, Aqtóbe oblystarynyń jáne Almaty qalasy ákimdikteriniń bul baǵyttaǵy jumystary mardymsyz júrgizilýde – 2%-dan 14%-ǵa deıin ǵana qamtylǵan. Oljas Bektenov jumysty kúsheıtýdi tapsyrdy.
Jaramsyz turmystyq balondardy qoldanystan shyǵarý jáne ýtılızasıalaý máselesin sheshý qajettigi atap ótildi. Oljas Bektenov ákimdikterge júktelgen gaz jabdyqtaryn qaýipsiz paıdalaný talaptarynyń saqtalýyn baqylaý tıisti deńgeıde júzege asyrylmaıtynyna nazar aýdardy. Gaz toltyrý pýnktteriniń menshik ıeleri tıisti túsindirý jumystaryn júrgizý qajet. Sonymen qatar Premer-mınıstr ónerkásip mınıstrligine múddeli memlekettik organdarmen birlesip, balondar óndirisin uıymdastyrý boıynsha sharalar qabyldaýdy tapsyrdy.
Sonymen qatar Premer-mınıstr halyq arasynda qaýipsizdik mádenıetin arttyrý boıynsha túsindirý jumystaryn júrgizýdiń mańyzdy ekenin atap ótti. Osyǵan baılanysty Tótenshe jaǵdaılar mınıstrligine İshki ister mınıstrligi men ákimdikter birlesip, jeke turǵyn úılerge reıd júrgizýdi jandandyrý tapsyryldy. Mádenıet jáne aqparat mınıstrligine jergilikti atqarýshy organdarmen birlesip buqaralyq aqparat quraldary men áleýmettik jelilerde profılaktıkalyq materıaldar taratý máselelerin pysyqtaý tapsyryldy. Tótenshe jaǵdaılar mınıstrligi aldyna jylý berý kezeńinde órttiń aldyn alý máseleleri boıynsha múddeli memlekettik organdar men ákimdikterdi tıimdi úılestirýdi qamtamasyz etý mindeti qoıyldy.