Kópshiligimiz uıqysyzdyq tek zıan dep oılaımyz. Alaıda keı jaǵdaıda onyń paıdaly jaǵy da bolýy múmkin.
Uıqysyzdyqtyń aǵzaǵa tıgizetin keri áseri jıi aıtylyp júr. Biraq sońǵy zertteýler men sarapshylardyń pikirinshe, bir tún uıyqtamaýdyń da oń áseri bolýy múmkin.
Brıtandyq dáriger ári Sleepyhead klınıkasynyń negizin qalaýshy Stefanı Romıshevskı Infobae basylymyna bergen suhbatynda uıqynyń jetispeýshiligine qatysty tyń pikir bildirdi. Onyń aıtýynsha, bir tún uıyqtamaý dofamın deńgeıiniń ýaqytsha kóterilýine sebep bolady. Bul – adamnyń qýattanyp, kóńil-kúıiniń jaqsarýyna, zeıinniń artýyna jáne shyǵarmashylyq oılaý qabiletiniń belsenýine áser etedi.
«Keıde ádeıi uıyqtatpaý ádisi depressıany emdeý kezinde qoldanylady. Sebebi bul kóńil-kúıdi jaqsartyp, adamǵa ýaqytsha sergektik beredi», – deıdi dáriger.
Degenmen Stefanı Romıshevskı bul ádisti uzaq merzimdi strategıa retinde qoldanýǵa bolmaıtynyn eskertedi. Bul – tek bir rettik psıhologıalyq kómek quraly ǵana.
Al somnolog Keıtlın Cheısser uıqynyń mańyzdylyǵyn alǵa tartady. Ol túngi demalystyń jetispeýi teriniń jaǵdaıyna keri áser etip, bezeýdiń paıda bolýyna sebep bolatynyn aıtady.
Uıqysyzdyqtyń zıany týraly kóp aıtylǵanymen, keıbir erekshe jaǵdaılarda onyń belgili bir paıdasy bolýy múmkin. Degenmen, bul – turaqty tájirıbe emes, tek ýaqytsha jaǵdaı retinde qarastyrylýy tıis. Uıqy – adamnyń fızıkalyq jáne psıhıkalyq saýlyǵy úshin óte mańyzdy.