Qaýipsizdik qaperden shyqpasyn: Almatylyq dárigerler ata-analar men balalarǵa qaýipsizdik erejelerin úıretti
Óńirlik komýnıkasıalar qyzmetinde, Balalarǵa jedel medısınalyq kómek ortalyǵynyń qabyldaý bóliminiń meńgerýshisi, balalar hırýrgy jáne travmotolog Meıirjan Qurmanálıev balalardy oqys oqıǵadan qalaı jáne qaıtip qorǵaýǵa bolatynyn aıtyp berdi, dep habarlaıdy aqshamnews.kz.
«Balalardyń jaraqat alýy da jasyna qaraı bolady. Mektepke deıingi jastaǵylary kóbine eresekter durys qaramaǵandyqtan jazym bolyp qalyp jatsa, oqýshylar jaǵy oınap júrip, birnárseni ustaımyn dep júrip jaraqat alyp jatady», - deıdi Meıirjan Qurmanálıev.
Osyǵan qaraǵanda, jaraqat alǵandardyń kóbi - oqýshylar. Oǵan mektepke barǵany, úlkenderdiń baqylaýsyz jiberip alǵany sıaqty birneshe sebep túrtki bolady. Mamannyń aıtýynsha, aýlada júrip, oıyn oınap, sportpen aınalysyp júrip alǵan jaraqat birinshi orynda tur.
Balalardyń jaraqattanyp qalýynyń negizgi sebepteri:
Balaǵa qaramaǵannan (45 %);
Balanyń baıqamaı jaraqat alýy (25 paıyz);
Oqys oqıǵa (2%);
Jol-kólik oqıǵasy men basqa da sebepter.
Almaty qalasyndaǵy balalar aýrýhanalarynyń qabyldaý bólimderine (№ 2 qalalyq balalar klınıkalyq aýrýhanasy men Balalarǵa jedel medısınalyq kómek ortalyǵy) bir jyl ishinde 104 myńnan astam naýqas jedel medısınalyq kómekke júgindi, onyń ishinde 21,8 myńy neırohırýrgıa jáne 48 myńǵa jýyǵy travmatologıa boıynsha. Neırohırýrgıalyq dıagnozben 3,3 myń naýqas aýrýhanaǵa jatqyzylsa, 3,9 myńǵa jýyǵy jaraqat alǵan. Kúıik alǵan 1,6 myń adam kómekke júginip, onyń 1 myńnan astamy aýrýhanaǵa jatqyzyldy. Osy jyldyń bes aıynda Almaty qalalyq Balalarǵa jedel medısınalyq kómek ortalyǵynyń qabyldaý bólimine 19,6 myń bala tústi.
«Bizdiń dáriger-travmatologtar kúndelikti ártúrli jastaǵy balalardyń ata-anasymen kezdesip, balany jaraqattanyp qalýdan qalaı qorǵaýǵa bolatynyn aıtyp, dáris oqıdy. Travmatologıa bóliminiń keshendi jumys josparynyń aıasynda pasıentterge, olardyń ata-anasyna arnap saýat ashatyn semınardy da qosa ótkizip jatyrmyz», - dep tolyqtyrdy maman.
Balalar jaraqattanyp qalmas úshin dárigerdiń ata-analarǵa bergen keńesi:
jol qaýipsizdigi týraly balalarmen únemi áńgimelesý kerek;
shuǵyl kómek qyzmetiniń nómiri yńǵaıly jerde jazýly tursyn;
balańyzǵa qaýipsizdik erejesin túsindirińiz;
dári-dármekti balanyń qoly jetpeıtin jerde ustańyz;
sýdyń mańynda balany qaraýsyz qaldyrmańyz.