Jazasyn óteýshilerdiń deni 18-35 jas aralyǵyndaǵy jastar.
Elimizde bas bostandyǵynan aıyrylyp, túrmede otyrǵan adamdar da joǵary oqý oryndarynda bilim alýy múmkin, dep habarlaıdy almaty-akshamy.kz.
Qazaqstannyń Adam quqyqtary jónindegi ýákili Ǵylym jáne joǵary bilim mınıstrinen sottalýshylarǵa oqý kvotasyn bólýdi surap otyr.
Artýr Lastaevtyń málimetinshe, jazasyn óteýshilerdiń deni 18-35 jas aralyǵyndaǵy jastar. Oǵan qosa, qamaýdaǵy 28 500 adamnyń 59 paıyzy orta, 24 paıyzy arnaýly orta bilimdi, 6 paıyzy múldem bilim almaǵan. Sondyqtan olardy durys jolǵa beıimdeýdiń birden bir baǵyty - mamandyq alýlaryna múmkindik jasaý deıdi.
Onyń aıtýynsha, bakalavrıat baǵdarlamalary boıynsha oqýdyń ortasha quny jylyna 1 mıllıon teńge. Bul somany sottalýshylar tóleı almaıdy.
"Joǵary bilim alý – sottalǵandarǵa bostandyqqa shyqqannan keıin óz múmkindikterin iske asyrý tıimdiligin arttyrýǵa jol ashatyn, sol arqyly qaıta qylmys jasaý yqtımaldyǵyn azaıtyp, áleýmettendirýge arnalǵan baǵyttardyń biri. Sonymen qatar memlekettiń mindeti – sottalǵandardy túzeý mekemesinen tys ómirge daıyndaý", – dedi Adam quqyqtary jónindegi ýákil Artýr Lastaev.