QR Densaýlyq saqtaý mınıstrligi perzenthanalarda medısınalyq kómektiń sapasyn jaqsartý maqsatynda bosandyrý jáne neonatologıa salasynda qyzmetter kórsetýge arnalǵan tarıfterdi qaıta qarady.
Sonymen, 1 maýsymnan bastap kesar tiligin qosa alǵanda, kúrdeli bosanýǵa arnalǵan tarıfter 60%-ǵa, al jańa týǵan nárestelerge kútim jasaý - 35%-ǵa ulǵaıdy. Bul medısınalyq qyzmetterdiń tizbesi men sapasyn keńeıtýge jáne bilikti mamandardy tartýǵa múmkindik beredi, dep habarlaıdy Almaty-akshamy.kz.
QR DSM málimetinshe, sońǵy jyldary tarıfter medısınalyq uıymdardyń bosanatyn áıelder men jańa týǵan nárestelerge kútim jasaýǵa baılanysty shyǵystaryn ótemedi. Bosandyrýmen aınalysatyn medısınalyq uıymdardy jetkiliksiz qarjylandyrý olardyń sońǵy birneshe jyldyń ishinde qalyptasqan kredıtorlyq beresheginiń negizgi sebepteriniń birine aınaldy.
Tarıfterdi qaıta esepteý kezinde medısınalyq mekemelerdiń pasıentterge qyzmet kórsetý kezinde kóteretin naqty shyǵyndary eskerildi. Qabyldanǵan sharalar medısınalyq uıymdarǵa qarjylyq turaqtylyqqa qol jetkizýge múmkindik beredi, bul óz kezeginde halyq úshin medısınalyq kómektiń sapasy men qoljetimdiligin jaqsartady. Al perzenthanalarda bolý ana men bala úshin yńǵaıly ári qaýipsiz bolady.
Densaýlyq saqtaý mınıstrligi Qazaqstandaǵy árbir otbasy qoljetimdi jáne sapaly medısınalyq kómekke sene alatyndaı densaýlyq saqtaý júıesin jetildirýdi jalǵastyrady. Osy maqsatta 2024 jylǵy 1 maýsymnan bastap balalar nevrologıasy, balalar alergologıasy, revmatologıa boıynsha medısınalyq kómek kórsetetin uıymdar úshin tarıfterdiń mólsheri ulǵaıtyldy.